陳美齡痛憶後藤健二 失眠成個月
旅居日本的香港藝人陳美齡（Agnes），獲香港浸會大學舉行相片展，表揚她多年來積極宣揚和平友愛。Agnes日前受訪提到去年曾與被伊斯蘭國處決的日本人質後藤健二到過非洲探訪，對這位好友的離世，至今仍難釋懷：「我成個月都瞓得唔好。」
集歌手、作家、大學教授、慈善大使於一身的陳美齡，多年來積極宣揚和平友愛，昨日獲香港浸會大學為她舉行「全為愛 陳美齡博士與天地孩兒」相片展以作表揚，Agnes希望透過走遍逾二十國的探訪經歷，喚起各界關注世上飽受苦難的天地孩兒。
聞被擄難以置信
日前Agnes接受訪問，提到曾與被極端組織伊斯蘭國處決的日本人質後藤健二往非洲探訪：「我同後藤係好好朋友，舊年4月我哋一齊去咗非洲做探訪，佢好好人，同成班義工都好熟，記得當日聽到佢被擄，我哋唔敢相信，成班義工都喺度問：『係咪真係佢？』本來佢好有機會返到嚟（獲釋），後尾返唔到，我成個月都瞓得唔好，因為佢真係一個好好嘅人。」
取消敍利亞行程
Agnes續說：「後藤好錫屋企人，好關心自己三個女，有次佢發咗LINE，佢等到最後一刻，個女覆咗先肯上機。（有指佢喺人質片段中，以眨眼發摩斯密碼，叫人唔使救佢？）其實佢當日係去敍利亞救佢朋友（人質湯川遙菜），我諗去得都已經有心理準備，戰爭好討厭，好無陰功，依家中東、非洲等地都好亂，我本來今個月都要去敍利亞探訪，但後尾都取消咗。」
文：影視組