馬詩慧撐曼喜網播善心
名模馬詩慧與藝人王敏德育有三名子女，最細的兒子躍穎也升中三，大女曼喜更已投身社會，還籌備網店生意做老闆，但在媽媽眼中仔女永遠長不大，對大女創業她覺得十分有意義，大表支持，而曼喜亦希望所做的事，除了獲得認同外，還希望家人為她感到驕傲。
今日年三十闔家慶團圓，但對名模馬詩慧（Janet）一家來說，已多年沒有一家五口齊齊整整一起吃團年飯，因二女麗嘉在美國讀書，未能回港；雖然如此，但Janet亦十分着重團年，每年都會嚴選餐廳歎美食，今年還特別點有意頭的菜式，如羅漢福滿袋、乳豬鵝肝醬窩巴、還有七彩燕窩鮑魚撈起等等，寓意風生水起。
Michael開舖又出碟
談到新年大計，王敏德（Michael）透露除了主理他的自家店舖外，還會在樂壇大展拳腳：「剛剛出咗隻唱片，全部都係自己填詞，嚟緊都會再出，而時裝店舖除了香港外，還會在大陸開分店，日日都好忙。」而一向重視家庭的Janet被問到會否幫老公打理生意，她說：「冇，佢都冇叫我幫手，我個人比較直同埋主觀，如果大家一齊做嘢，唔一定合得嚟，同埋唔好以為小朋友大咗可以放心，其實大唔晒，某程度上都仲要睇實、照顧佢哋。」
曼喜網店公平貿易
在母親眼中，子女永遠長不大，但其實大女曼喜不但有主見、理想遠大，而且有顆善良的心，她透露新一年籌備網店生意，希望暑假正式運作：「主要係做時裝，但會同慈善團體合作，我哋會以公平貿易方式去做，搵嘅廠房一定要計足加班錢、唔可以用小朋友打工，對工人要公平對待，唔可以搵佢哋着數，雖然會令到成本高咗，但賺錢唔係最重要，希望帶出訊息，關注人權、公平、環保等問題。」而Janet亦大表支持：「搵唔搵到錢其次，最重要唔係浪費時間做無謂嘢，佢有呢份心而且做得開心，why not。（金錢上支持佢？）佢未問我攞錢，哈哈！」曼喜即時說：「我希望做嘅嘢係家人為我感到驕傲，真係做啲實質嘢幫助人。」
場地：中環國金軒
文：名人組