吳若希嫌桃花多 羊年「撈起」
許廷鏗（Alfred）、吳若希（Jinny）以唱片公司一哥、一姐身份請同門鄭俊弘、胡鴻鈞等食團年飯，為省靚公司招牌及攞好意頭，合力炮製「撈起」，眾人齊祝星夢娛樂業務蒸蒸日上、藝人大紅大紫以及《東方日報》讀者身體健康。
Alfred及Jinny日前相約師弟妹鄭俊弘、胡鴻鈞、鄭世豪、王君馨及新人譚嘉儀食團年飯，面對重量級賀年食品「撈起」時興奮得失控喪食，眾人為搶好意頭大啖大啖塞入口，更賣口乖齊作「七星報喜」：「祝公司再創佳績，最緊要大家都健康！」Alfred與Jinny去年密密商演吸金大成功，荷包脹自然更豪氣，兩人爭住埋單作東。
視進軍紅館為目標
去年是非纏身的Jinny希望羊年能過平靜生活：「唔想再令父母擔心，我最緊張家人。（羊年搵個真命天子？）唔急，都畀啲報道嚇走晒啦。」曾勇奪「叱咤男歌手」銅獎的Alfred坦言視進軍紅館為目標，問他可會於羊年成事？Alfred說：「其實公司喺2014年問我有冇興趣做，自己要少少時間籌備同儲歌，時機嚟就順住去。」
鄭俊弘有個豐收年
早前橫掃各大頒獎禮「新人獎」的鄭俊弘承認是豐收年，他說：「令我做到以前發夢嘅事，對我嚟講好重要。」並透露正計劃舉行演唱會Part II。而忙於拍攝劇集《殭》的胡鴻鈞希望羊年有更多機會同出新專輯。另外，Jinny和鄭俊弘昨日出席活動時，Jinny透露會行花市，但買桔不買桃花，全因嫌桃花過盛：「多得有少少過火。」
採訪：火品木
攝影：劉斌
場地：都會海逸酒店
服裝：（吳若希）ROXY、（鄭俊弘）American Eagle、（許廷鏗）Mijosu、（鄭世豪）Cubic、（王君馨）Preziouz