冼國林拋700萬借亞視員工
亞視員工一月薪金尚未有着落，執行董事葉家寶只稱會給員工利是攞意頭，可是年關「缺水」難過，亞視助理副總裁冼偉智為給同事解燃眉之急，私下向經營財務公司的堂兄冼國林提議，免利息免手續費向未出糧的每位員工借出一萬元。冼偉智昨受訪承認：「堂大佬好好，二話不說就應承，聽日會先攞出六至七百萬元現金入嚟亞視，借畀有需要員工，承諾唔收息同手續費，等到三月開始還款，每月還一千，希望可幫輕同事過年關！」
原想低調的冼國林，雖大手筆無條件借出幾百萬元幫亞視員工度年關，但他不打算今天現身亞視，笑言自己都有少少人識，年尾攞住大筆錢隨時被人「伏」：「免得危險，我只叫咗同事攞錢入亞視，到時有解款員傍住！（同情？）係感動，如果我有班咁有義氣嘅員工就好！我覺得亞視股東應該反省，生意輸咗就輸咗，千幾萬冇咩，都唔肯畀員工出糧，戥佢哋慘！」而亞視發言人黃先生回應：「呢個係純屬員工福利，並非公司借糧。」