阿佘浪漫撞暈逼古仔負責
古天樂（古仔）於新片化身機師與佘詩曼（阿佘）上演泳池激吻及互噴剃鬚膏等浪漫橋段，古仔自爆不慎撞到對方頭暈，阿佘則乘機撒嬌：「要佢照顧我下半生！」
型男古天樂在《衝上雲霄》電影版中，化身chok爆機師兼航空公司老闆，於戲中與初戀女友佘詩曼愛火重燃。二人不但於泳池激吻，古仔更冒雨為阿佘着鞋，又手拖手駕古董飛機及互噴剃鬚膏等，Sweet到爆！阿佘更以性感低Ｖ睡裙「肉搏」半裸上身的古仔，上演剃鬚膏大戰，可惜最後慘被噴到滿頭剃鬚膏，畫面香艷！古仔又大爆浪漫背後的「蝦碌位」，自言拍攝時不慎撞到阿佘頭暈：「落泳池梗係要除衫啦，結果咪凍到我牙都震，仲要扮陶醉，現場幾十人又打燈又收音，搞笑多啲！之後剃鬚膏戰劇情講我攬住阿佘跌倒，點知計錯數，撞到佢暈陀陀！」
Sweet到動心
阿佘對此笑言要對方「負責」下半生：「初時知要同古仔合作，真係驚驚哋，識落原來好好人。剃鬚膏戰嗰場戲我撞親，佢不斷向我say sorry，我講笑要佢照顧我下半生！其實我一向傻傻哋，無咩所謂，最緊要拍出嚟靚。」她又不禁開腔直認被「電暈」：「剃鬚膏大戰場戲好有拍拖feel，我睇play back都覺得好sweet。如果現實有咁浪漫就好，可惜仲未遇到好似戲中古仔令我傾心嘅男友！」