Ana R. 踩行turbo等報喜

名模Ana R.昨日出席Dream Skin韓式蝸牛護膚新秘技傳媒發布會時，透露好友們將於農曆新年到她家中開派對，並揚言會準備利是給一眾好友及他們的子女。問她情人節與老公Brad有何節目？她表示不清楚，卻揚言希望收花：「我好鍾意收花，不過鍾意朱古力、糖果多啲。（會肥喎。）肥啲對生BB好啲！」

與老公結婚一年的Ana，已準備好組織一個家庭，她笑道：「我哋做咗好多練習啦，所謂practice makes perfect。（不設防？）冇設防啦。我將以前所有學過嘅避孕方法都拋諸腦後。」她坦言會一直工作，直至懷孕後才減少工作量，但強調不會引退。問到老公是否不希望她工作？她說：「佢好傳統，佢都想我做家庭主婦，唔想我做得咁辛苦，不過佢知道做嘢能夠令我開心，所以畀我繼續做。」而為了作好生B的準備，她正多做瑜伽，以及看中醫調理身體。

洪子崎與男友挑選嬰兒孭帶。

洪子崎懷孕四個半月，上圍連升三cup。

男友陪買嬰兒用品

至於去年十二月才宣布與男友Lee Tsui訂婚的洪子崎（Angelina）原來已懷孕四個半月，昨日兩人到嬰兒用品店為迎接BB來臨作準備，Angelina坦言今次懷孕是計劃中的意外，她說：「我一直都好想早啲生BB，但就打亂咗我嘅結婚大計，我哋計劃六月舉行婚禮，但依家要延遲，等BB出世後識行路先搞，到時BB可以做我哋嘅花童。」

未婚有孕，Angelina更連犯兩禁，穿上三吋高跟鞋行街，又在懷孕期間搬屋，認真百無禁忌，她笑道：「因為間屋唔夠住，所以搬大啲，又唔係我動手搬，冇問題，我只係從旁指揮。」Angelina稱現時已重了8公斤，上圍更連升三cup呢！

場地：Mother Court

文：名人組