嘉玲搞護膚生意 偉仔做白老鼠
劉嘉玲、梁家輝及謝君豪前晚為第三度公演的舞台劇《杜老誌》進行首場演出，家輝及君豪齊齊恭喜嘉玲的面膜生意獲投資者入股2億。做生意頭頭是道的嘉玲否認會棄演從商，但她透露將推出男士護膚品，更指老公梁朝偉是她的白老鼠。
劉嘉玲、梁家輝及謝君豪前晚在演藝學院演出由英皇娛樂主辦，毛俊輝導演、梁李少霞監製的舞台劇《杜老誌》，此劇第三度公演，依然座無虛席，更吸引到蔡一傑等捧場，張學友、羅美薇和甄楚倩等送上鮮花祝三位主角演出成功。
搵家輝拍廣告
梁家輝透露舞台劇有機會衝出香港，他笑說：「我收到風，有人嚟睇過，好似想將個劇搬去外埠做，依家考慮緊！」君豪則說：「香港暫時應該係唔會再做，但出埠要集齊成台戲五、六十人，要夾大家個期都好唔容易！」嘉玲就說：「我哋呢三次演出大家都喺齊度，我都推咗好多嘢，因為要尊重表演藝術！」
嘉玲被問到有指其面膜產品獲投資者入股2億，她坦承：「係有件咁嘅事，但初步傾，未正式簽紙。（做生意好成功？）我只係做咗3個月，當初冇諗過咁好反應，完全想像唔到！我係慢慢學，我對化妝、護膚、美容都有心得嘅，我都有畀意見點包裝同推廣，下次搵埋梁家輝拍廣告。（你喺微博放素顏相，做生招牌被讚勇敢？）其實化唔化妝，都要面對真實嘅自己，素顏有素顏嘅靚，如果一起身化行晒個妝，隔籬嗰個都驚啦！（鍾意做生意多過演戲？）唔會，我好享受舞台上嘅每秒鐘，生活同做戲只要投入同enjoy，係會做得好嘅！」
獲讚素顏夠勇
君豪追問嘉玲會否推出男士護膚品，嘉玲豪爽回答：「為咗你即刻出！」家輝則大讚嘉玲：「好多人唔敢素顏，但嘉玲姐點同！（你都有用護膚品心得？）我幾十年嚟都冇用喎！」嘉玲聞言即勸說：「咁你要用啦！（梁朝偉有用護膚品？）梗係，佢係我嘅白老鼠！」
文：影視組