秋生彈新人唱功屎 軒仔：佢恨鐵不成鋼
向來敢言的黃秋生有感而發列出樂壇終極「揞名爆」，大數樂壇很多新一輩歌手唔合格！自認是唱功好「男妓」的張敬軒力撐秋生只是恨鐵不成鋼，希望樂壇有更多新血。
「新城勁爆頒獎禮2014」在26日晚圓滿結束，一向對音樂執着的黃秋生前晚突然大寫「樂評」，直指樂壇青黃不接「十個只有一個合格」，暗寸頒獎禮上有歌手走音、咪嘴，更似「寶塚男色歌舞團」，嫌疑人包括組合天堂鳥及韓國男團N-Sonic等。但秋生的評論相當公平，點名讚王梓軒及糖妹，又指「男妓」
和「光頭星」唱功不錯。
吳若希：走音唔係醜事
對於秋生的評語，頒獎禮當晚奪得三個半獎的張敬軒笑謂：「個『男妓』肯定係講我啦，我覺得係話我，但我都公道啲講句我哋呢一代係唔爭氣，我當晚都表現得麻麻，阿Sir（黃秋生）係音樂人，一向都好恨鐵不成鋼，鍾意多啲新血。」被讚的王梓軒和糖妹異口同聲感謝秋生賞識，又賣口乖想跟對方學做戲。成為「寶塚男色歌舞團」嫌疑人之一的天堂鳥稱：「應該唔係話我哋，次次都係唱Live。」當晚有份出席的吳若希則稱：「走音唔係醜事，歌手都係人，畀次機會我哋喺錯誤中成長。」
另外，周四晚舉行的「叱咤樂壇頒獎禮」上，預測容祖兒跟楊千嬅爭「叱咤樂壇女歌手」金獎，薛凱琪則是銅獎得主；「叱咤樂壇男歌手」預計周柏豪首度奪金獎，銀獎是許志安，銅獎則是張敬軒跟陳奕迅之戰。
文：音樂組