郭晉安硬撬峯迷
郭晉安與佘詩曼於電視圈打滾多年，獎項對他們來說，不是最重要，但對演員卻是一個很大的肯定，日前，二人分別再奪「視帝」及「視后」獎項，但仍有野心繼續搏殺。有美滿家庭的安仔專心事業，更笑言要走回偶像派，趁林峯不在，擸埋他的粉絲，再奪第四個台慶視帝獎。而仍是單身的佘詩曼則指現時是事業高峰期，要搵完美另一半不容易，坦言向錢看一早嫁了，笑言搵錢易過搵愛呢！
今年無綫再度誕生另一位「三屆視帝」郭晉安（安仔），不少人留意到他得獎當晚狀態大勇，連外貌亦變得「後生」。問他是否被寶貝仔女「淨化」而「回春」？年屆五十的安仔打趣表示要重返偶像派陣營，又笑言要搶走林峯的粉絲：「有仔女令我更有童真，依家有咗（攞獎）實力，就走返偶像派，我趁林峯唔喺度，擸埋佢啲粉絲！」
狂妄頂撞導演
安仔於頒獎禮上亦「眼濕濕」感謝一對仔女的出現，使他拋開自大及驕傲等負面性格，安仔自爆曾經將自大誤以為自信，當年性格「起晒弶」，曾大言不慚地與劇集導演「駁火」，他說：「以前成敗得失都自己揹，產生嘅壓力就造成盲點。我試過同導演吵大鑊，企硬唔合作，仲大言不慚咁話『我係要咁演，得唔得都由我負責』！我起晒稜角，結果令到為件事好嘅人都受傷害。」幸好他結婚生子後悟出身教的重要性，決意執正自己為一對兒女作榜樣。
靠家人愛包容
眼見兒女令安仔得以「重生」，問他會否打算再追B？安仔坦言未打算收爐：「睇緣分，我同太太（歐倩怡）冇諗再生或唔生。依家湊兩個容易集中精神，將會為佢哋重新裝修屋企半年。（如果再生Ｂ？）咁就要靠哥哥（郭令山）照顧佢喇。」提起愛妻，一臉冧爆的安仔不禁再次感激她的包容及體貼：「演員靠情緒搵飯食，一失控就會任性。見到太太唔出聲咁受晒（氣），我都難過自己唔成熟。佢之前同仔女拍咗條驚喜短片畀我，話我知屋企由佢睇住同叫我安心工作。我感動到即刻打電話畀佢，冧到講唔到嘢！」
文：影視組