祖兒爆師兄求愛 恃醉行兇
樂壇天后容祖兒和劉浩龍（師兄）拍拖兩年不時晒恩愛，但鮮有公開談情，日前祖兒和填詞人好友黃偉文（Wyman）擔任汪明荃（阿姐）主持的無綫節目《女皇的盛宴》嘉賓時，被阿姐大逼供追問「龍兒戀」，令舞台上威風八面的祖兒怯得要狂灌香檳壯膽，乖乖在電視螢幕前首度分享這段「由友變情」的戀愛。
關心過火
在前晚播出的節目中，阿姐單刀直入問祖兒跟師兄如何開始？祖兒謂當初覺得師兄「吊兒郎當」，但突然發覺他可以為備戰演唱會而變得積極，那時她覺得：「我都做過騷，會希望呢個時候有朋友支持同鼓勵，不如我就擔任呢個角色，但嗰時真係完全冇諗過（發展）。」後來祖兒也奇怪自己「關心」程度超乎正常，直到師兄臨開騷跟祖兒說「真係好多謝你呀」時，祖兒即感覺到「有啲嘢喎」，其後她和師兄齊出席Wyman生日派對，師兄飲酒後向祖兒展開追求。Wyman表示祖兒將來結婚要做證婚人，祖兒稱一定要，但暫時未有結婚計劃，也一定會生BB。
祖兒表示因從未試過同時間被多過兩個異性追求而懷疑自己「唔正常」，又被Wyman踢爆她曾被朋友發現煮泰國雞翼「出貓」，祖兒尷尬謂：「係拉姑（狄波拉）幫我買醃好嘅雞翼嘅，佢有份串謀，拉姑話我落鑊炸係好辛苦、好危險嘅事，唔算係『出貓』喎！」
文：音樂組