袁嘉敏拜神擺款 Jeana藐爆
前港姐袁嘉敏升呢做女主角，未見成績先見是非，擺款犯眾憎遭同片女演員群起杯葛！昨日她出席新片拜神儀式時最遲現身，即被何佩瑜（Jeana）及梁敏儀等藐爆！但袁嘉敏卻一於懶理，聲稱不覺被杯葛。問是否與Jeana爭戲份？她更自認是女一，又推監製王晶出來「擋駕」﹕「佢（王晶）喺我隔籬，要唔要問吓佢吖？」
袁嘉敏入行以來發展平平，直至最近答允全裸演出王晶新片《鴨王》，人氣一度被炒高，結果有人即患「大頭症」！
影海報打尖早走
據知，早前劇組集齊一眾主角拍海報，被安排擺臥地甫士的袁嘉敏即呻「腰痠背痛」，由於甫士生硬，在場攝影師忙「執靚甫士」，卻遭她冷言對待，不時「衰聲」回應：「得啦，係咁喎。」有指Jeana為緩和氣氛，頻與大家說笑及「載歌載舞」，然而袁嘉敏繼續不識趣，拍單人照要求「插隊」，最後更以趕時間為由率先離場，「派頭」果然十足！
昨日電影公司安排袁嘉敏、Jeana、梁敏儀、唐紫睿及何浩文（Dominic）等登上遊艇為《鴨》片進行開鏡拜神儀式，一眾女角齊以三點式亮相吸睛。儀式開始袁嘉敏竟「殿後」壓軸現身，其他三位女角終按捺不住齊齊「藐爆」，結果影大合照時她更與Jeana等企得「生疏」，要記者多番提點才「扮親熱」，然據知今次袁嘉敏「壓軸」出場全拜工作人員所賜：「佢行出去前條泳衣帶鬆咗，本嚟其他三個女仔都停低等埋佢，係服裝話唔使等，叫佢哋行先，咪搞成咁囉。」
事後唐紫睿及梁敏儀接受記者訪問，異口同聲對袁嘉敏近日的舉動頗有微言。至於與她戲份相若的Jeana被追問有關影海報時的情況表示：「其他嘢冇留意，因為嗰日我忙於做小丑，氹番大家開心嘛。（袁嘉敏要求早走？）總之我係最後一個留低影單人相囉。（佢強調自己係女主角？）其實電影係team work嚟嘅，拍出嚟觀眾喜歡、票房大賣先係重點，如果唔係畀個女主角銜頭你，又有咩用呢？實力先係最緊要！」
「份約寫明我係主角」
對於被拍檔們群起杯葛及「藐爆」，袁嘉敏昨接受電話訪問時死撐謂：「吓？唔知喎，我冇同佢哋同場，即使合作過嘅梁敏儀，我同佢都唔係好熟……係咪今日凍咋？（你同Jeana爭戲份？）晶哥喺我身邊，要唔要問吓佢呀？總之我份約寫明我係女主角。（戲份多過佢？）應該係。」
另外，為突出自己的角色造型，Dominic「僭建」現身，「異鵰」盡現人前！他靦腆謂：「行路時要擘髀，去廁所都要過幾關先得，所以要求服裝幫我加個魔術貼，方便啲嘛。（吳君如搵林峯喺佢部戲度做鴨王喎。）佢適合成熟一輩睇，我做嘅比較輕鬆囉。」
文：影視組