孔令政真實謊言 呃港人撐場
香港新進導演孔令政（James）首部作品《第七謊言》，終於在香港正式上映，James已憑該片先後在歐美獲電影界頒發嘉許獎項，他希望戲中的說故事方式，能一新香港觀眾耳目。
孔令政雖然首執導演筒，但已先後獲美國費城、洛杉磯及西班牙巴塞隆拿電影界頒發嘉許獎項，對此他謙稱：「其實拍戲同參展都唔係為攞獎，但我哋冇大公司支持，冇龐大宣傳費，要畀觀眾知道我哋套戲，於是諗到參展。」
James續說：「好開心獲認同，早排我去台灣出席放映會，發現觀眾對套戲各有睇法，美國觀眾覺得套戲有美劇Feel，西班牙人會問香港人係咪咁計較傳宗接代？台灣觀眾就驚訝點解我咁年輕，可以寫出橫跨三代嘅故事。我期望香港觀眾鍾意我嘅電影手法，畀多啲支持新導演。」
「不知不覺說謊」
對於謊言，James有深刻體會，更與英國作家Ian Leslie著作《不說謊，我們活不下去》（Born Liars: Why We Can't Live Without Deceit）的「人天生就會說謊」看法睇齊，James說：「謊言唔使教，人喺好細個就已經識講，例如明明未食飯都話食咗，目的只係想食雪糕。喺群體生活要知自己角色，用乜態度，當人愈大，角色愈多，會有更多謊言去應對呢個世界，唔使刻意鑽研謊言，人係不知不覺就會講謊言嘅生物。」
文：影視組
攝：吳文聰