香香唔夠Open 怕剝光豬玩彩繪

藝人岑麗香（香香）昨日身穿低V碎花裙，現身沙田任活動嘉賓，與人體彩繪大師齊齊為表演者「點睛」。問到她會否怕走光？她直言好安全：「黐晒膠紙，打晒底！（酬勞好所以性感？）唔關事，出活動係公司安排，我就負責玩啫，幾開心！（請教高海寧？）佢好叻，我哋每次出event都會袋定啲膠紙。」問到有否玩過人體彩繪？香香坦言未玩過：「試過喺嘉年華幫小朋友畫面，幾好玩。但全身就比較怕醜啲，未必會除晒衫畀人畫，我冇佢哋咁夠膽。」

只去過一次蘭桂坊

至於今晚萬聖節將如何慶祝？小時候喜歡為南瓜裝飾的香香，表示會與朋友食飯。至於有否試過到蘭桂坊歡度萬聖節？她坦言從未試過，來港至今亦只到過蘭桂坊一次，而當時亦沒有男性上前結識：「見啲人好玩、好放！」

香香為扮演紅鶴的表演者「點睛」。

香香笑言事前已黐足膠紙，以防走光。

放假返加國遊星馬

而香香前晚出席無綫劇煞科宴時，就透露終於有假期可讓她去旅行充電：「有可能返溫哥華探吓屋企人，或者會同朋友去星馬度假。一拍劇就冇時間，好似同朋友有啲疏離，都要畀啲時間去維繫友誼。」

文：影視組