黃美棋DIY女帽 學做Lady

忙於為賽馬節目《馬上全接觸》擔任主持的黃美棋（Maggie），日前相約帽飾設計師Janice Mok請教製作女帽的方法，希望親手製作出獨一無二的帽飾出席年度馬壇盛事「莎莎婦女銀袋日」。平日愛下廚「煮幾味」的Maggie原來是整帽初哥：「自己好少做小手工，反而係整嘢食多，平時最多都係買啲現成飾物返嚟，再修改少少。我平時都鍾意戴頭飾出街，所以都幾有興趣試吓自己整飾物，因為可以加好多自己想要嘅元素落去。」

設計師指導

設計師Janice為Maggie精心挑選Pillbox的女帽款式：「今次教Maggie整嘅款式叫Pillbox，係一種常見嘅女帽（Millinery），款式比較簡單同trendy，設計上亦會重視線條多啲。我特登揀咗隻young啲嘅顏色，襯番Maggie嘅形象。」而首次學整帽的Maggie，起初未能準確拿捏揼釘的力度而大嘆好難，幸得Janice協助而成功完成作品！

扮靚開心事

Maggie平日予人活潑可愛的感覺，故她希望入場偷師學做Lady：「我平時好少着啲好Lady嘅衫，嗰日可以試吓好Lady咁入場，又可以欣賞到人哋點扮靚，順便偷吓師。同埋係女仔都鍾意扮靚o架啦，擺好多心機去諗點襯衫同襯帽，係一件賞心樂事！」

製帽過程Step 2：起釘	製帽過程Step 3：整蝴蝶結	製帽過程Step 4：圍帽邊

文：專案組　

攝：林蔚恩　

場地：跑馬地馬場　

服裝：Jessica