Vanessa冧仔講feel 鍾情波牛
模特兒段隆臻（Vanessa）笑容燦爛似足女星蔡卓妍（阿Sa），因此被封為「翻版阿Sa」。熱愛足球的Vanessa甚受球迷歡迎，她表示對「愛波之人」絕對會加分，最愛球星則是利物浦的謝拉特及古天奴！
年僅21歲的「翻版阿Sa」Vanessa屬於超級球迷，經常不惜捱眼瞓睇波，每次提起足球都眉飛色舞，她稱最愛英格蘭國家隊及英超勁旅利物浦，大讚謝拉特、費蘭度托利斯及新星古天奴最吸引。
常收球迷情信
熱愛運動的Vanessa喜歡滑水、潛水及打籃球，外形陽光活潑，曬得一身健康膚色。她表示揀男友亦偏向運動型：「鍾意做運動會夾啲，識波嘅話會加分，但最緊要講feel，外形唔要靚仔，太靚仔反而會驚。」開朗的她經常到球場一齊睇波，與男球迷相處，電暈大批男士。雖然不乏裙下之臣，但她都一一拒愛：「有收過情信同禮物，話想追我，但最後都冇辦法開花結果，因為我唔想拍拖住，想做一個演員，希望演到一啲有發揮嘅角色，好似林嘉欣嘅《怪物》，好大挑戰！」
中文名似男仔
Vanessa的中文名段隆臻相當特別，她解釋因父母是台灣人，自爆名字令她多次被誤會為男仔：「試過去camp被人編入男仔房，入到房覺得好尷尬，要搞手重新編過，亦試過面試前被人誤會係男仔。細個唔鍾意個名，大個覺得好型好特別，所以唔會改。」臉圓圓的Vanessa笑容似足阿Sa，氣質亦有點似性感女神周秀娜，她笑言貌似兩位女神感覺榮幸：「佢兩位靚之餘，亦好聰明同勤力，係值得學習對象，話我似佢哋，絕對係讚美。」
Profile
段隆臻（Vanessa）
出生日期：1993年10月7日
身高：1米65
三圍：32B、23、33
興趣：滑水、潛水、
打籃球、打Wargame、睇波
文：立影
攝：劉斌