黎耀祥破格 臭寸爭視帝
三奪視帝的黎耀祥（祥仔）在台慶劇《名門暗戰》中，破格飾演臭寸、自大富二代商家，與「太監五虎」成員黃浩然、關菊英（菊姐）等鬥智鬥力，昇華演技獲監製羅永賢睇好四度封帝！
「太監五虎」成員黎耀祥（祥仔）、黃浩然、蕭正楠（Edwin）、曹永廉及陳國邦由古代鬥到現代，再度於無綫台慶劇《名門暗戰》（前名《商戰》）合作，故事圍繞飾演豪門長子的祥仔，與戰友浩然、Edwin、國邦及胡定欣等在商場打天下，惟其父岳華是個唯利是圖的商家，不斷狙擊有「天使投資者」之稱的祥仔，令兩人關係產生矛盾。
角色踩界難度高
同時，育有一兒一女的繼室關菊英（菊姐），一直希望大仔陳智燊（Jason）能承繼父業，使家中的暗湧逐漸演變成鬥爭。今次劇集豪擲七位數字打造靚人靚景，劇中的宴會廳、餐廳、屋企、遊艇盡量以實景拍攝，演員更出動私伙珠寶首飾及服裝，認真揼本！而《名》劇將於11月3日首播。
雖然祥仔曾三奪視帝寶座，監製羅永賢卻睇好他再冧莊：「無論佢攞過幾多次都好，應該攞就要畀佢。」他透露劇中祥仔扮演又寸又自大、但個性大膽創新的領袖：「嚴格嚟講，佢冇演過呢種角色，好多角色佢都做過，今次都係個新嘗試，開頭都有同佢講要小心，因為呢個角色有啲踩界，處理得唔好觀眾會覺得佢囂張、臭寸，但祥仔好有信心，拿捏得相當好。」
提到於2012年合拍《大太監》，事隔兩年再次合作，羅監製指對方不再是昔日的小人物：「祥仔好就一定，今日嘅佢有種領導氣質，幕後大家相處時都感受到。」
文：影視組