胡杏兒有人追唔啱feel
胡杏兒昨日以大中華區代言人身份出席鐘錶品牌TEMPORIS新品發布會，下星期生日的她笑言希望時間可以停頓，她說：「希望愈大愈靚。生日會喺香港同屋企人及朋友慶祝。（仲未有另一半同你慶祝？）冇呀，之前嗰啲都係誤傳。有追求者，不過唔適合，要有感覺先得，但係我覺得單身都OK，唔會為拍拖而拍拖。我要積極啲，睇吓啲朋友有冇介紹。」
她又透露仍未跟無綫續約：「未到期，都傾緊，自己年紀唔細，要諗清楚。（要諗啲咩？）我覺得工作咗已有一段好長嘅時間，要諗吓嚟緊條路想點行，出年就入行16年。（咁你有咩要求？）冇，唔想畀太大壓力自己，人生除咗工作仲有其他嘢。（要有時間畀你識男朋友？）呢樣好緊要。同埋想分配吓要做啲咩。」
另外，問到有傳舊愛黃宗澤有新歡，她說：「呢啲唔應該再問我，咁有女朋友或者新歡係好正常，無論如何都祝福佢，只要佢開心。」