李亞男被爆愛食雞啫啫

王祖藍、李亞男、郭晉安、萬綺雯、張繼聰及林盛斌等為無綫劇《老表，你好hea！》出席宣傳活動，祖藍與女友李亞男同台，公然耍花槍，句句夭心夭肺。祖藍取笑亞男在劇中的廣東話不標準，亞男說：「其實都係做番自己，唔算辛苦，我現實中講嘢都唔正，有啲外國口音。」祖藍則玩踢爆說：「上次仲好笑呀，佢（亞男）話要食『雞啫啫煲』喎！」亞男聞言哭笑不得，但之後見男友被觀眾用吹氣bon bon棒扑頭，她即挺身護男友說：「唔好打得咁勁，會打傷咗佢呀！」兩人連耍花槍晒恩愛都要爭取時間，唔介意擺上枱當宣傳。

撐Baby下巴冇變

祖藍坦言近日工作忙：「之前為搞《老表》，依家要還債，拍內地版《Running Man》同旅遊節目《蜜月套房》，搞到周圍飛。（有指Angelababy下巴有異樣？）邊有？梗係冇，其實佢豁出去，都冇見過佢咁醜嘅一面，佢已經放下身段。」祖藍指新劇反應未如預期，他說：「有啲計錯數，可能笑話太in，未必人人明白，媽媽級家庭觀眾唔係咁留意社會問題。但網上反應好，年輕人比較接受，點擊率排第一位。（大受打擊？）起初有少少，但唔緊要，下次做好啲。」

否認與安仔不和

他提到劇中使用亞視《我和殭屍有個約會》歌曲，他說：「我check過版權，問過作曲家及作詞家協會，冇問題！（無綫冇過問？）咁萬綺雯都可以出現喺無綫，今次係大膽嘗試，網友話聽到首歌好感動。」他又否認與郭晉安不和：「唔會不和，同佢不嬲老友，我好多謝佢鼓勵我，我哋有傾今後嘅合作，佢都好有興趣。（有指你《老表3》飛起佢？）我根本冇諗住開第3輯，見好就收，想轉其他題材。」安仔亦否應不和傳聞並期待有新合作。

文：影視組