范冰冰濃顏大露
紅地氈向來是女星們爭妍鬥麗的戰場，想成為全場搶眼之最，當然要揀選合適的戰衣作悉心打扮，由頭到腳都不容有失，不然的話，任憑你是女神級數也一樣神仙難救。早前一眾女星出席北京時尚活動，大多以一副戰鬥格上場，連有份赴會的男星亦西裝骨骨上陣。眾星打扮，當中有讚有彈，名模陳嘉容讚有中國第一美人之稱的女星范冰冰打扮漂亮優雅，可惜妝容太濃扣了分。而身為女神的台灣女星陳妍希卻打扮得像個OL，似返工多過行紅地氈。
Angelababy
「佢近年轉走成熟路線，擺脫少女味，呢條裙嘅設計好有立體感，散發淑女氣息，充滿女人味，髮型化妝亦恰到好處，整體感覺高貴優雅，同黃曉明好襯。」
黃曉明
「佢身形夠高大健碩，簡單一套黑色西裝都着得好好睇，好有型，有種風度翩翩嘅感覺。」
高圓圓
「佢一向有氣質，不過今次有啲失手，條裙感覺娘娘地，嗰兩條吊帶扣咗分，令到成個造型冇咗賣點，一啲都唔eye catching，同埋着到佢冇乜身材。如果冇咗兩條吊帶，而係off shoulder嘅款式會靚好多同搶眼好多。」
范冰冰
「條裙好靚，佢都着得好好睇，好優雅，髮型都好襯，可惜個妝太濃，條頸鏈亦太累贅，太多details令人有啲眼花繚亂嘅感覺。個手袋同條裙唔襯，黑色有啲突兀，換個細啲嘅銀色、蝦肉色或粉紅色手袋仔會好睇啲。」
林志穎
「依然保持住佢嘅年輕甜美男神形象，打扮充滿青春活力氣息，好襯佢嘅style，格仔衫有old school感覺，但係髮型gel得太高，顯得有啲老土。」
章子怡
「幾特別，好欣賞佢條裙喺腰間有個大玫瑰花點綴，不過件衫就有返工feel，太斯文，加埋啲黑間條，同條裙唔係好襯。換件全黑色或單一色嘅低V或低圓領背心，cutting再貼身啲，成個感覺同線條會更加靚。」
陳妍希
「佢條cocktail dress着到好似返工look咁，似OL多過去行紅地氈，毫無特別，一啲星味都冇，髮型同化妝亦都唔襯，望落格格不入。」
陳喬恩
「睇到佢有花心思去dress up，高貴大方，髮型化妝都好match，如果加番條頸鏈會更加好睇，因為佢本身膚色好白，條裙嘅顏色又好pale，加條頸鏈會令視覺效果更豐富，更有層次感。」
Profile
名模特兒陳嘉容（Eunis），曾為各大國際品牌行時裝騷，在時裝界打滾多年，不論時裝理論還是實戰都難不倒她，近年更為電視時裝節目擔任主持，化身stylist教人配襯衣着打扮。