任達華帶挈慧英紅 有錢齊齊搵
同期出道的任達華與惠英紅，可謂不「打」不相識。一次打通電話讓原本走在平衡線上的二人，最終踏上了「交叉點」，這對好朋友雖不常聯絡，但見面卻有說不完的話題。投資有道的「華哥」不時向「紅妹」傳授相關心得，實行齊齊致富，最近二人更雙雙以天價續約英皇電影，事業路上繼續並肩作戰！
紅：惠英紅
華：任達華
紅：估唔到我哋同期出道，會搞到近年先有機會合作同混熟。講真，我以前睇電視劇已經覺得你好有型，不過大家一直都唔識……你記唔記得我哋第一次傾偈係因為買車吖？
華：係呀，以前我同小四（惠天賜）熟啲，但你講起買車呢件事，都十幾年前喎。
買車攞折結緣
紅：當時我去咗你代言嘅車行買車，簽約時四圍打聽你嘅電話號碼，睇吓你幫唔幫到我攞折。我膽粗粗打畀你，話想你幫吓手，呢啲情形有啲人聽咗當算，你就真係做嘢，我坐咗喺度十分鐘就有「好消息」嘞。
華：記得都幫你慳咗幾萬蚊呀，不過講你都唔信，我做代言人只係收咗封大利是，成件事出心想幫朋友（按：車行老闆），真心覺得朋友緊要過一切囉。
紅：同你做朋友冇得頂啦，我成日向你請教投資心得，最記得你年前教我人民幣儲蓄，又話上海樓房潛力十足。
華：你依家喺將軍澳好多「地盤」，物業多到「柴米油鹽醬醋茶」一個租戶借一樣都得。
紅：咪笑我啦，我就係買唔到你嗰啲勁嘢，咪細細哋買吓囉，邊似你世界各地都入到貨呀？等我數吓先：英國、台灣、香港、泰國……你都有物業，冇錯喎？我就自問冇呢啲命，當年喺北京睇樓，只需45萬人民幣就做到業主，但我覺得隔山打牛冇買，依家層樓升到過千萬人民幣嘞。
密謀買舖 益埋老友
華：我做咁多投資，都係深信「一舖養三代」，香港人最好就係買磚頭，做男人梗係要負起責任，等屋企人生活好啲、安心啲啦。呢排我都想再買舖，最好買夠10間開便利店，等啲朋友退休去打理，大家都有啲嘢做吓。
紅：我真係冇你咁有眼光，記得07、08年嘅中秋，拍劇開開吓廠接到個電話，被通知發生咗「雷曼事件」，我又試過學人去買內地科網股，結果變晒牆紙……好彩我份人樂觀，覺得冇咗咪再搵過囉，「雷曼」嗰次我換件戲服行番出嚟，就乜都唔記得晒嘞。
走過低潮 重新出發
華：其實你能夠唔記得以前唔開心事（按：惠英紅曾患上抑鬱症），重新出發，我都戥你開心。
紅：可能我係山東人，比較要面，當時諗唔通，思想轉咗入牛角尖……正如你所講，朋友真係緊要過一切，係人生寶庫，我喺谷底時好開心身邊有班朋友幫我、畀機會我，所以年前我再攞影后，開心嘅唔係因為自己得獎，而係因為有佢哋！
華：我都唔見得完全一帆風順，當年拍《家變》演同性戀，日日喺街畀人鬧，感覺好難受，惟有頭耷行開扮冇嘢，依家都仲記得當時情形，不過始終係工作，冇得話後悔接演咗嘅。
合拍愛情片
紅：我以前拍戲試過做第二女主角，但都畀人呼喝，叫我去一堆臭衫度自行搵戲服，由嗰日開始我就同自己講，一定要努力向上……呢幾年我同你合作機會多咗，你係我嘅好情人、老公，可能到咗依家咁嘅年紀，銀幕上比較難搵到合適嘅拍檔嘞。
華：嚟緊我會同你開拍一部愛情片，見證男女主角幾十年嘅經歷，都幾期待呀。
紅：話時話，點解上次你開戲做導演，唔畀個角色我？好失望囉。
華：上次我執導三分一套戲咋，況且請唔起你啦。
紅：講呢啲！我冇所謂，旨在參與嘛，下次記得預埋我呀。
後記：寄語唔好怕蝕底
惠英紅斗膽取笑任達華，指他是家中兩位公主的奴隸：「一提到老婆同囡囡，佢個樣就冧爆，好幸福囉。」這位好好先生對朋友同樣有情有義，談及成功之道，他難免說教般奉勸時下新一代，做人最緊要不怕被搵笨：「做人千祈唔好斤斤計較，有時蝕少少，到頭來可能反過嚟，會變成自己嘅一個機會。做嘢唔好執着，凡事都只要求回報就唔得，做好自己係最基本嘅。」大家收到未？
文：影視組
攝：李柏儒
任達華髮型：Ritz Lam@Hair Corner
場地提供：Bar6ix@Lan Kwai Fong