Kay索爆殭屍 勤練超能力
眼見老公張繼聰拍劇做出成績形象入屋，人妻謝安琪亦希望一過戲癮，前晚活動上她自爆明年將為無綫「處女」拍劇集，到時化身索爆殭屍，與老公齊齊在公仔箱爭取觀眾佔有率，除歌迷外再爭視迷群眾。
歌手謝安琪（Kay）前晚現身電視城錄影無綫節目《全城響應助更生》，期間她着住超高高跟鞋獻唱新歌，一步一驚心！Kay於受訪時自爆明年將首次拍攝無綫劇集，更將會化身索爆殭屍，她說：「夾咗半年時間先成事。（處女拍劇？）係，我好鍾意扮殭屍，又靚又有超能力。我成日喺屋企練用念力熄燈，最後張繼聰就會去熄燈。」
讚老公有小聰明
首次拍劇的Kay可會感到緊張？她即說對吊威吔有陰影：「緊張，因為吊威吔會好痛。我試過拍廣告時吊威吔勒得太緊，搞到我嘔，好驚！」
11月Kay會進行功夫練習，先行打好底子，明年2月就會開拍劇集。問她會否向密密拍劇的老公張繼聰偷師？Kay即「賣口乖」大讚老公：「佢話考慮吓（教我），我好欣賞佢演戲時嘅小聰明，好吸引我去睇！（你要扮殭屍，怕唔怕嚇親囝囝張瞻？）我大肚時狂睇殭屍片，所以我個仔都好鍾意睇。如果我演殭屍，佢會好崇拜我！佢好好笑，成日希望有變身嘅能力。」
林欣彤唔使升胸
另外，同場還有歌手林欣彤（Mag）及許廷鏗、朱千雪及黃心穎等藝人，Mag對於在新碟谷胸晒腿的性感造型大表滿意：「我畀人話我呃人，影到對腳咁長。（效果好性感？）冇特登谷胸，只想變高。（升胸？）唔使，夠用OK喇！」許廷鏗則說已買碟支持Mag。
文：影視組