陳展鵬開齋呆封帝阿佘釘實視后

無綫台慶頒獎禮於年底才舉行，但昨晚於新加坡舉行的《星和無綫電視大獎2014》，陳展鵬與佘詩曼先拔頭籌稱帝封后，爆冷首嘗視帝滋味的展鵬心情激動，而一枝獨秀攞視后的「釘姐」阿佘也難掩興奮之情，揚言對無綫視后獎打了支強心針。

一年一度的無綫《萬千星輝頒獎禮》將於12月舉行，雖然還未公布入圍名單，但分別在新加坡和馬來西亞舉行的《星和無綫電視大獎2014》及《TVB馬來西亞星光薈萃頒獎典禮2014》則率先登場，該兩個頒獎禮被視為台慶頒獎禮的前哨戰，一眾獲獎者更是指標之一，而昨晚於新加坡的頒獎禮，吸引大批小生、花旦赴會，繼有佘詩曼、田蕊妮、徐子珊、鍾嘉欣、岑麗香、郭晉安、陳展鵬、馬國明、林夏薇等，星光熠熠，場面熱鬧。

台上眼濕講感受

大會共頒發17個獎項，當中「我最愛TVB男主角、女主角」由陳展鵬及佘詩曼獲得，展鵬憑劇集《叛逃》揮低陳豪、黃宗澤、馬國明等爆冷開齋奪視帝，宣布一刻展鵬表情愕然，重演馬明的招牌天然呆，並攬住身旁鍾嘉欣，上台時眼濕濕表示拍罷該劇後有點失落，皆因等待三年仍未播出，更謂：「我嘅星途唔係一、兩年就有呢個機會，但原來繼續努力終有機會，就係今日，多謝樂小姐同經理人。」捱足20年的他自過檔無綫後獲力捧，演出劇集《巨輪》、《單戀雙城》等獲好評，早前剃頭拍攝的新劇《張保仔》更是無綫大製作。談到首奪視帝滋味，展鵬笑到四萬咁口謂：「真係冇諗過，心情好激動，（覺唔覺得自己爆冷？）對手真係好強，但今次係fans投票，所以好多謝佢哋，（會唔會之後兩個頒獎禮更加有信心？）呢啲就順其自然啦！有呢個獎已經好滿足。」而展鵬亦憑另一套劇《巨輪》獲得「我最愛TVB角色獎」，戴帽的他被司儀鄭裕玲要求除帽示人，結果展鵬把帽及眼鏡一併除下，引來台下fans歡呼聲不斷。

阿佘捧獎，笑言拍攝時的辛苦情景，一幕幕重現出來。

家燕與祖藍捧綜藝節目主持人獎，繼續扮嘢。

有信心繼續再攞

回歸無綫的阿佘狀態大勇，憑熱播劇《使徒行者》「阿釘」一角梅開二度獲「最愛角色」獎兼大熱封后，以tube dress淺露事業線的她艷壓其他女星，踏上頒獎台時因高跟鞋太高，要馬國明扶上台。阿佘回憶拍攝該劇初期在頸椎移位情況下開工，再加上失眠令體重下降至90多磅，但為免影響拍攝進度仍堅持開工，如今憑該劇封視后，對阿佘來說別具意義，談到角色效應令她名利雙收，再創事業高峰，阿佘笑不攏嘴謂：「多謝大家支持，證明『阿釘』好受觀眾喜愛，呢個獎令我諗番起拍攝時嘅情景，一幕幕咁浮現出嚟，幾辛苦都值得。（對之後再攞視后有信心？）未到最後一分鐘都唔知邊個係贏家，不過對自己都有信心，做人梗係要有信心，但唔想畀自己太大壓力，順其自然，有就錦上添花！」而《忠奸人》則奪「我最愛TVB電視劇集」。