周麗淇難頂引誘想偷食

藝人周麗淇（Niki）與名模陳嘉容（Eunis）昨日出席「Tommy Hilfiger x Breast Health International」手袋發布會。以壓軸嘉賓現身的周麗淇，透露近年開始注重身體健康，除勤練瑜伽外，近日在好友黃佩霞建議下，正式進行為期三日的果汁斷食計劃。

照撐枱腳各自開餐

Niki透露斷食主要希望清腸胃，非為減肥：「以健康為主，暫時試咗一日，但驚寒底。因為睇開中醫所以唔可以飲凍嘢，會等啲果汁暖啲先飲。（效果如何？）唔知，會試咗三日先，再繼續考慮更長時間。」問到是否想養好身體做待嫁新娘？Niki則否認：「估到你哋會咁問，都係身體健康緊要啲。自己平時好為食，消化唔夠好，依家趁有時間養好身體。」

周麗淇與陳嘉容昨日齊齊出席手袋發布會。

陳嘉容對限量手袋收益撥捐防乳癌基金，大表支持。

她又指在斷食期間，不時被同事及好友引誘。Niki表示：「同事同身邊朋友都引我。出活動前同事話雞髀好好味。（想偷食？）今日第一日咋，自己以前其實都好鍾意食雞髀。好彩啲果汁顏色好靚，加上自己戒咗食肉，唔食嘢唔會死嘅。」當提到可考慮與男友徐正曦一同斷食時，她即耍手擰頭：「佢已經唔係好食嘢。佢依家喺香港，叫佢唔好引誘我。（撐枱腳咁點算？）佢有佢食，我飲我嘅果汁。」

晚晚按摩預防乳癌

另外，同場的名模陳嘉容對於活動上發布的限量手袋，售出收益將撥捐去防止乳癌的非牟利基金，表示非常支持。Eunis表示：「男性都有機會患乳癌。（點預防？）自己晚晚都會按摩，間中摸吓同去檢查。」透露身邊亦曾有朋友因患乳癌而過身：「自己每半年就會去做身體檢查。身邊曾有女性朋友患乳癌，但已經過咗身，40歲左右，本身切咗一邊（乳房），但最後都係擴散。」

文：名人組