亞視高層籲緊守崗位 離巢鄭伊娜支票出糧
亞視傳出「拖糧」，昨日亞視助理副總裁趙汝強作出回應，他認為今次能體驗亞視精神，同事雖然冇糧出但也敬業樂業地返工。而執行董事葉家寶在另一活動中表示已向亞視員工致歉，指今次超過勞工處七日內出糧的規定，正尋求解決方案：「亞視一直虧本，每月薪水係靠股東和借款畀亞視嘅人士解決，今次收到股東變換或變賣股權嘅消息，影響到出糧，希望亞視員工緊守崗位。亦希望事件今個星期內解決。」
多位亞視藝人對亞視欠薪各有看法，袁潔儀未因欠薪令生活受影響，但擔心有家庭壓力的同事，呼籲員工繼續支持公司。蔡國威直言擔心：「不過體諒公司因股權變動未能及時發薪，總之我會繼續堅守崗位。」已約滿亞視的前亞姐鄭伊娜則順利取得支票出糧，她說：「相信拎張票畀同事睇吓，可以激勵佢哋，增加信心！」剛續約亞視一年的劉錫賢表示失望及唔知點算：「我打去問，只係話有啲事同股東問題延遲，但冇講原因，原本一號出糧，已經遲咗八日。」他呼籲股東出來解釋，不要影響員工生計。
另外，亞視證實部分股東正洽售股權，並因帳面餘額不足未能支付近千名藝員及職員9月份工資，涉違反《僱傭條例》。勞工處證實收到亞視員工求助，並向亞視發出警告，表明在有足夠證據下，必定提出檢控。而通訊事務管理局表示，尚未收到亞視股權變動的申請，強調任何變動，都須根據《廣播條例》和相關牌照條款向通訊局申請。據公司註冊處資料，亞視去年委任的內地董事Xi Jackson已於上月5日辭職，同日委任王杰為董事，另兩名董事Brown Peter George和甄紫琦於上月30日辭職，未見股份變動。