品冠飛人爸爸 上網箍仔女心
馬來西亞男歌手品冠婚後「三年抱兩」生了一子一女，成功湊到一個「好」字。榮升爸爸的他在新碟內特別寫一首歌給兒子，坦言兒女給他更多創作靈感。因工作要四圍飛的品冠又會爭取時間上網與子女「約會」，以免被他們當成陌生人。
品冠2012年與女友拉埋天窗，去年大仔出世，今年6月又宣布女兒女出，成功「三年抱兩」兼湊成「好」字。最近他推出新碟，更特別創作了一首歌送給1歲的兒子兼搵埋兒子拍攝MV。品冠坦言有小孩之後令個人更成長：「明白到生命嘅奧妙，同小朋友玩嘅時候成個人精神晒，有種好甜蜜嘅感覺。」他又表示有小孩後，反而教識他生活上另一面，亦令他的創作帶來更多靈感。
唱廣東歌補數
因為藝人工作要四圍飛，品冠擔心子女會把他當成陌生人，所以他會盡量抽時間與子女用電腦見面：「我會盡量同小朋友用視訊見面，其實都好掛住佢哋，好擔心返到去佢哋會覺得我好陌生，佢哋成長時間好快，唔可以浪費同佢哋相處嘅時間。」
屈指一算，品冠對上一次來香港開演唱會已是2009年的紅館騷，但他表示明年將會再來港開騷見歌迷，他笑言要開騷重新「箍實」粉絲的心：「好多香港粉絲喺網上面問點解我咁耐唔去香港開騷，除咗啲忠實粉絲支持外，都要做啲嘢累積番啲歌迷，可能到時會唱多啲廣東歌補數。」
服裝：MUSIUM DIV by I.T