盧頌之影圈發圍 情侶檔都制
熱愛演戲的模特兒盧頌之（DaDa）希望透過拍戲發掘另一個自己，她直言最想與杜琪峯導演合作。而現實中與趙勁皓拍拖的DaDa更不介意sweet到戲內，只怕忍唔住互笑對方。
模特兒出身的盧頌之（DaDa）自從年前開始拍戲，就愛上演戲的感覺，每每去到片場都會變得龍精虎猛。希望作多方面嘗試的DaDa直言想同杜琪峯導演合作：「我對拍戲有憧憬，但自己就冇定咩目標，反而自己想同唔同嘅電影人合作，例如杜琪峯。因為每個導演拍嘅戲都有自己嘅特色，佢哋眼中嘅你可能係另一個你，希望透過佢哋發掘到自己唔同嘅一面。」DaDa又透露希望未來有機會挑戰高難度，演繹內心戲重的角色。
男友幫宣傳
DaDa與男友趙勁皓（King）拍拖將近一年，但依然sweet到漏，她更不介意拍戲再演情侶：「我都驚如果拍戲都做情侶的話會忍唔住笑，因為我哋平時私底下都癲癲哋，但都係一個好好嘅經驗。」近年主力拍戲的DaDa早前亦與朋友合資搞生意，被問到有否向King取經時，她笑言：「其實佢都有幫手，例如佢成日都着住我哋件T-shirt，做咩都着住，都算幫到手，我都會分番少少錢畀佢。」
文：專案組
攝：吳文聰
場地：Flair Iron