高海寧寄情工作hold住愛
高海寧（高Ling）於新劇內扮演「情聖」，為陳展鵬無限付出卻得不到回報，而現實生活中她卻自認實際派，不會被感情蒙蔽雙眼，且直言短期內會全力專注事業發展：「因為機會真係嚟嘞﹗」
高Ling於無綫新劇《大藥坊》內扮演一名有經歷的女子，最終過不了情關，周旋於陳展鵬及鍾嘉欣之間當「第三者」，卻得不到感情回報，她直言角色挑戰甚高，內心戲頻繁：「好欣賞角色人物嘅敢愛敢恨，而我自己就喜歡簡單，怕太過複雜嘅感情關係，更加未試過主動向男生表白。」
然而高Ling禁不住記者追問，自爆求學時也曾暗戀過一位男同學達3年之久，甚至對方開始拍拖她仍未想過放棄：「當時鍾意佢傻更更，成日都好開心咁笑，畫畫靚寫字又靚……不過我保守，都係覺得要等對方開聲先。」高Ling更確信男女關係，理應由朋友慢慢發展而成！
想做豪邁角色
其實較之於拍拖，高Ling直言覺得將時間投資於事業與家庭比較實際：「以前想做，但未必有機會，所以得個『想』字，但依家公司（無綫）真係畀多咗機會我，演嘅角色好有發揮，好想畀大家知道，除咗身材同樣貌外，我都識演戲嘅。（依家最想做啲乜角色？）一啲豪邁同硬朗嘅角色，要推推撞撞都冇問題。」
而近日忙於拍攝電影《賭城風雲2》的她，直言片場內被周潤發的「神乎其技」吸引：「發哥唔單止人好，幾頁紙嘅對白，無論做幾多次佢都唔會講錯一句，仲要係冇劇本跟身，真係好厲害。而今次我最開心係同劉偉強合作，我好鍾意佢執導嘅《不再讓你孤單》，一個男人能夠咁明白女人心，令我好感動囉，況且佢好耐心指點我，唔係外傳咁惡囉。」
文：影視組