江若琳儲電 伺機再爆
藝人江若琳與寰宇公司鬧出合約糾紛，更導致官司纏身，嚴重影響她的精神及財政狀況。於這黑暗時期，她決定到倫敦進修兩個多星期，過平靜的生活。回港後，正式重新出發，更積極挑選劇本，望繼續於香港及內地大展拳腳。
江若琳（Elanne）與合作十年的寰宇公司鬧出合約糾紛，更傳出她表面風光，但實際上入行十年收入少之又少的傳聞，她更因合約問題而惹上官非，令她蒙受極大的精神及財政壓力。難得Elanne從沒想過放棄，休息三個月後，便重整心情，重新投入工作。
入行十年，Elanne笑言自己經歷過不少風風雨雨，當然這次涉及訴訟，令她的心理壓力飆升，達到臨近崩潰的程度。故她早前決定遠離是非之地，到倫敦報讀短期進修課程，增值之餘，亦過一下簡單生活，重拾平靜的心境。她說：「其實入行咁多年，每日都好忙，所以都想畀個機會自己身心放吓假。我選擇咗去倫敦兩個幾星期，讀跳舞同演戲。喺嗰邊每日都好似體驗番以前嘅學校生活咁，同唔同國家嘅同學一齊上堂，到放lunch嗰陣就一齊坐喺草地上食飯盒，拎住本劇本讀同排戲，好輕鬆、好開心。」
老外搭訕食檸檬
她笑言自己早已希望到藝術氣息如此濃厚的國家生活，如今更一試難忘，坦言假若將來有機會，定必重返當地生活。問到是否被當地的美男子所吸引，才希望於當地長駐？她笑言：「雖然都有啲艷遇，喺街度都有啲男仔截停我，想問我攞電話。我同佢講『我嚟旅遊，冇電話！』，不過就算有，我都唔會畀啦！要拍拖嘅話，我要多啲時間同對方相處、了解，今次得兩個幾星期實在太短，下次有緣分再見先算啦！」
路始終要走下去
雖然Elanne對感情抱隨緣態度，但對工作方面，卻積極得多。即使與寰宇公司的合約糾紛尚未平息，理論上不能私自接工作，但作為藝人，手停口停，Elanne總不能坐以待斃，她抱着「路始終要走下去」的心態，繼續生活，更自己接洽工作。她說：「依家係自己嘅新開始，只要有適合自己嘅工作都會接。其實依家都有電視劇同電影嘅劇本揀緊，無論係內地或香港嘅工作都冇所謂。因為我生命力強，無論去到邊都生存到。不過如果可以嘅話，我希望可以將一半時間放喺香港、一半時間放喺內地，做到兩邊都兼顧到就最理想。」
獲母支持減壓力
所謂經一事、長一智，Elanne坦言經歷這次黑暗的時光，更令她深深感受到家人及朋友的重要性。她感激地表示：「媽咪成日同我講唔使擔心，你想做乜、想實現咩夢想都會支持，無論我係想繼續工作，定係去讀書，佢都會全力支持，真係令我少咗好多壓力。除咗屋企人，我都收到好多朋友嘅短訊問候，無論係一句『加油』，定係一句『支持你』，都令我覺得好窩心，令我知道我有好多人陪住、我唔會孤單。」
愛大錶有型
Elanne視腕錶為飾物之一，平日以smart casual造型示人的她，笑言自己愈來愈喜歡戴中性款式的腕錶。她說：「近年買嘅錶都偏向男性化少少，愈嚟愈大隻，戴起嚟好似好有型咁！好似Tissot嘅運動型腕錶，唔單止大大隻，仲有埋計時功能，跑步嗰時可以用嚟計時，又靚又實用。」
採訪：龔凱欣
攝影：劉斌
服裝：Rue Madame
鞋履：Giuseppe Zanotti Design