杜德偉教Chok腰：冇佢冇下一代！
杜德偉（Alex）一連兩晚「極杜世界巡迴演唱會」前晚在紅館舉行尾場，當他與容祖兒又跳又唱《信自己》時炒熱全場氣氛。他兩度落台攬錫老婆又攬又咀，最後晒「鑽鵰」前更示範Chok下體動作教生仔：「冇佢冇下一代！」
Alex相隔21年再踏紅館，除了吸引舊愛周汶錡和吳君如分別撐場外，關之琳更首度高調偕富商男友陳泰銘欣賞，聯同即將結婚的鍾鎮濤及女友范姜一齊出現，引起哄動。影帝張家輝出席完首映禮趕到紅館捧場，還有草蜢三子、張智霖、陳慧嫻、林海峰等，眾星齊集星光熠熠。
搞喊老婆
尾場容祖兒和衞蘭（Janice）擔任表演嘉賓，Alex與Janice首次同台合唱，之前嚷着減肥的Janice依然「肥過部電單車」。祖兒則與Alex合唱經典金曲《信自己》時大顯舞技，令全場氣氛即時加熱。期間Alex兩度落台攬錫太太，激讚Ice是好老婆：「冇咗你，冇咁幸福，真係想再娶妳一次。」搞到太太感動爆喊拭淚，Alex亦雙眼通紅。
最抵死是Alex唱《脫掉》晒閃爆三角褲前，教全場歌迷做「下身向前Chok」動作：「呢個動作好緊要，冇佢冇下一代！」就連大美人關之琳都玩埋一份。Alex兩度Encore，最後更穿浴袍出場。個唱後Alex透露會和太太到歐洲補度蜜月，但先會參加鍾鎮濤的婚禮。他又稱將到美加、星馬及內地巡唱，但因星馬及內地尺度嚴謹不能「脫」，故會想出更勁的演出來代替。提到台灣網絡紅人「內褲象」於首場觀眾席晒「鵰」，Alex笑言：「估唔到唱《脫掉》真係有Fans一齊脫。（對方身材點？）同我差唔多，但我Fit啲。」
文：音樂組