阿田咀安仔 老公嫌over
郭晉安、田蕊妮及吳卓羲昨為劇集《忠奸人》收視報捷宣傳，玩遊戲期間卓羲輕易孭起劉思希，但同場的陳智燊就抱唔起李亞男，搞到反晒艇，認真失威。而阿田就自爆老公杜汶澤大呻她與安仔咀戲太多，即時變成「師奶澤」！
藝人郭晉安、田蕊妮、吳卓羲昨日在將軍澳宣傳無綫劇《忠奸人》活動兼玩遊戲，吳卓羲孭起身穿短裙的劉思希，令她花容失色，陳智燊欲有樣學樣，打算「公主抱」李亞男，但最後反艇收場，非常冇面；至於「細細粒」陳嘉佳就由何遠東、安仔及卓羲三人合力揹起，場面爆笑！
聽配樂變奸
劇集收視甚佳，前晚更錄得31點收視，身為主角的安仔就大讚劇集配樂到位，笑言聽到主題曲就想變奸人：「一聽到就想做壞事同諗衰嘢。（屋企播？）隨時隨地聽！我依家講嘢幾真誠，都畀人嫌假。不過無論我喺套劇殺人定陷害人，有啲粉絲都好撐我。」與安仔飾演一對的阿田就自爆因咀戲太多，搞到老公杜汶澤大呻：「佢問我使唔使咀咁多？又問我知唔知安仔喺劇中好奸，仲錫佢咁多次？佢變咗『師奶澤』！」她又Sweet爆讚老公追劇好投入：「結婚咁多年都少投訴（拍咀戲），好開心佢咁肉緊畀反應，佢都入埋戲！」問到與樣子被批的劉思希拍咀戲的卓羲有否被「頂親」？他即自認鼻高：「佢冇頂親我，可能我鼻高會頂親佢。」
文：影視組