祖藍冇眼睇瀕分手
李亞男前晚谷胸以台灣「G奶天后」蔡依林（Jolin）造型出席扮嘢節目，又唱又跳非常火辣，不過卻被男友王祖藍詐型，嫌她的表演服過短，又躁爆埋怨女友於新劇連咀兩男：「根本係激將法，我諗我哋接近分手邊緣！」
王祖藍、李亞男、林盛斌（Bob）、鄭欣宜、方力申等前晚為《Sunday扮嘢王》錄影，熱戀中的「藍男」成為焦點，加上亞男谷胸扮G奶Jolin演繹《唇唇欲動》，又唱又跳令人睇到熱血沸騰，男友祖藍卻感不是味兒。而阿Bob與王俊棠等扮台灣組合F4獻唱《流星雨》，期間工作人員狂吹大風扇，令阿Bob上衣被吹起凸腩又甩掉假髮，場面爆笑。
連環咀係激將法
曾扮演過Jolin的祖藍，自言造型比女友所扮演的更維肖維妙，他亦對亞男近期於劇集《忠奸人》中分別與張繼聰及李子雄激吻表示冇眼睇：「我諗我哋接近分手邊緣，佢呢排咀完張繼聰又咀李子雄，一陣又有四個美男喺佢側邊，真係唔知呢排咩事激將法。（激你結婚？）我諗會離囉。（會否叮囑四美男咪多手？）無法控制到四位癲嘅喺台上做乜，我驚我睇到眼火爆，呢排好爆、好躁。」他又嫌女友表演服裝過短，要求工作人員為她加長。
錫「ＢＢ」都冇介意
倒是亞男未有介懷男友發牢騷，談到「胸」前澎湃，她笑說：「我竭盡所能做到同Jolin一樣效果，做好晒防走光措施，排練時扭傷腳趾，但表演時會豁出去。（祖藍下令加長條裙？）唔係喎，佢之前嫌太長騷唔到腳，覺得最緊要靚，所以剪到A字靚啲。（佢有冇唔畀你性感？）唔會，但會評論。」對於祖藍認為她跟男演員拍劇激咀是激將法，亞男笑言是劇情需要，指祖藍亦曾過目：「佢話合理，咁我咪放膽去做囉！佢都有錫好多乜ＢＢ，我都冇介意，出嚟entertaining咪由佢囉。」而擔任評判的方力申有興趣扮石修，覺得他識吹色士風及夾band好有型。
文：影視組