郭晉安揀錯輪椅險爆頭

藝人郭晉安（安仔）日前於無綫新劇《忠奸人》中飾演奸險大狀，相隔七年再演奸角的他自認全靠純良樣貌「食胡」：「我足足七年冇演奸角，就係我個樣生得純品，監製先會搵我做反派，因為咁先呃到全世界！」首度挑戰傷殘角色的他更要全程以輪椅代步，他自爆「烏龍」揀錯花式輪椅險些撞破頭：「我諗住最醒就係揀最輕巧的輪椅，點知原來係花式比賽用嘅，好易反車。（受傷？）冇，不過試過一心急就用力過猛，差點反車撼爆頭！」

背十八頁對白

安仔稱為新劇操肌練臂力：「我在劇中冇企過起身，要習慣坐住輪椅上樓梯同上車。（以手代腳？）係，所以會做引體上升練臂力！」他大爆以輪椅行動時用錯力，使雙手長期麻痹：「我雙手痹咗一個月，總共醫咗兩個月，搵咗三個醫生。（老婆歐倩怡擔心？）梗係！我初期以為打網球整親，之後針灸同啪骨好轉。」問他坐輪椅演戲會否有礙發揮演技？他否認說：「反而製造到浪漫位，好似我會用輪椅載埋阿田（田蕊妮）周街玩，幾sweet！」

郭晉安笑言可以用輪椅載田蕊妮周街玩。

郭晉安於劇中為阿田打官司，自爆背足十八頁對白。

談到於劇中與他飾演情侶的阿田，他自爆難忘背足十八頁對白為對方打官司：「佢係位好對手，好記得有場戲要背十八頁對白為佢打官司！我背咗八日，場戲由下晝四點拍到凌晨三點，背到條脷都打晒結！」

場地：Classified

文：影視組