張家瑩食上癮 開泰日餐廳
亞姐張家瑩（Grace）最近首次當老闆，與生意拍檔合資在銅鑼灣開設一間日本加泰國餐廳，而其創業之路更大有故事，她透露於日本開工時嘗到農場出品的和牛，一試上癮，她膽粗粗問場主買當地和牛，結果獲對方答應，直到後來又遇上泰國朋友，才萌生到把餐廳一分為二的意念！
最近闖飲食界的張家瑩，透露會想開餐廳，其實背後是有段古，她指：「有次去日本一個農場拍節目，試咗農場出品嘅和牛好好味，我問個場主會唔會賣啲和牛畀我，嗰陣我只係純粹問吓，根本冇決心要開餐廳，但日本人做事真係好認真，個場主諗咗一晚好認真咁答番我話OK，佢個答案令我認真研究開餐廳嘅計劃。」
試業反應不俗
而她於後來又遇上一位來自泰國東北部的朋友，令她萌起做日本加泰國餐廳的念頭：「我認識一位泰國東北部嘅朋友，佢介紹咗泰東北菜畀我，喺香港食到其實都係曼谷菜多，泰東北菜好少，所以我就建議餐廳一分為二，變成日本餐廳加泰國餐廳。呢度佔地3千呎，總投資七位數，我都投資咗七位數，試業咗個零月，不斷改進中，現時反應唔錯！」
出埠緊張生意
張家瑩動用七位數字來做生意，財力不容小覷，她說：「我由細到大都鍾意儲錢，唔係唔買嘢，係應使則使，向來唔大使，有剩錢就儲起，而且有做投資，都儲咗好多年至儲夠子彈，實現做生意夢想。（點平衡演藝工作同餐廳生意？）難取捨o架，出埠做嘢會心掛掛，同公司溝通咗，8月13日開幕禮前盡量唔出埠，之後會兩邊兼顧，唔會退出，因為我鍾意演藝工作至入行，做人唔應該局限自己，應該多方面發展事業。」
場地：Soi 18 Thai Cuisine
攝：鄭家俊
文：影視祖