周柏豪百萬新歡 擺街晒命
潮人周柏豪的「新女」曝光！昨日他揸住車牌「PH」、價值百多萬的Benz Jeep出巡，型人揸型車駕臨大坑道High Tea，實在羡煞旁人，不過柏豪隨手將「百幾萬」周街泊，就相信未必人人都捨得喇！
歌手周柏豪近年可謂愈撈愈旺，榮升廣告商及電影界新寵的他簡直豬籠入水，自家服裝品牌又大獲好評，難怪柏豪早前就豪花110多萬購入「新寵」Benz Jeep，更大花24萬投得英文名縮寫Pak Ho車牌「PH」，給予愛驅一個獨一無二的名份。
歎啡密斟
既然揼本購入新玩具，當然要拎出街「威威」啦！昨日下午五時許，頭戴cap帽兼一身潮Look的柏豪現身大坑道的一間咖啡店，門外正正泊住其落地未夠三個月的Jeep，雖然柏豪大拿拿將百幾萬的型車周街泊，但型人揸型車必定備受注目，故他並沒有完全放下戒心，跟經理人及唱片公司同事吹水歎茶之餘，更不時（目及）實愛驅，萬一「有咩依郁」都可以即時救駕。
未知柏豪是否正為下月底舉行的處男紅館演唱會度橋，他全程表情多多，更愈講愈興奮，似乎有好大諗頭，相信到時一定不會令歌迷失望。
文：音樂組
攝：追蹤組