孔令政連掃兩獎回饋港迷
香港新進導演孔令政（James）首部導演作品《第七謊言》，再傳喜訊，繼榮獲巴塞隆拿電影節頒發評審團獎項後，再獲美國費城Philadelphia Independent Film Festival頒發Best Foreign Film獎項，一個月內連掃兩獎，這位香港影壇後起之秀希望有更多機會將作品介紹畀本地觀眾，實在令人期待。
James上月底應邀到費城出席電影節，憑導演作品《第七謊言》有份角逐獎項的他，本抱着藉此機會與外國電影工作者交流的平常心出席，結果捧走Best Foreign Film獎項，談到得獎感受，他說：「記得主角鄭中基曾經同我講，話佢好鍾意《第七謊言》個故事，仲話：『千祈唔好心急，要畀心機做好套戲每一個細節，呢套戲一定有回響！』依家如佢所料，套戲做到一啲成績，我覺得大家付出咗嘅努力，終於有回報！（挾海外獲獎嘅威勢，刺激稍後在港上映嘅票房？）喺外國得獎，的確畀到我更多機會去將作品介紹畀本地觀眾，我希望香港觀眾同歐美一樣，可以畀多啲支持新導演，始終票房成績對新導演嘅未來發展有密切關係。」
鄭中基鼓勵參展
James初執導筒的《第七謊言》在外國電影頒獎禮上勢如破竹，問到有否信心在香港電影金像獎上同樣大放異彩，James謙虛表示：「金像獎近年比較注意新一代導演，本地電影業需要新血衝擊，我當然想喺頒獎台上令自己嘅作品畀到更多人認識，但我唔敢奢望！記得當初我拍完套戲，監製、製片、演員鄭中基、姜皓文等，都建議我將作品帶去參加各地影展，我參賽心態只係為咗同電影業界、觀眾做交流，我希望本地業界同觀眾都可以畀多啲意見我！」
文：影視組