謝婷婷憧憬非洲出嫁
藝人謝婷婷去年底被《好報》獨家踢爆與名媛李桂蘭混血兒子戴尚安（Sean）於南非進行拍照工作時火速撻着，擦出愛火花。雖然二人正打得火熱，暫無結婚打算的婷婷，卻憧憬來日結婚，地點會揀他倆定情之地——非洲。
自謝婷婷與Sean火速撻着後，戀情愈見浮面，拍拖未夠半年已發展到同居地步，難怪外界盛傳二人婚期逼近。昨日婷婷與周柏豪同出席時裝店開幕典禮，婷婷否認閃婚傳聞，更直言未有打算和沒有跟母親拉姑提及婚事，婷婷說：「今日有六個朋友打嚟問，話奇怪我媽咪點解會話我叫佢做準備，根本冇咁嘅事，大家都係得啖笑。」
視Sean為結婚對象
婷婷大方表示如有結婚打算一定會戴上婚戒示人，更堅稱自己唔會玩閃婚，更不諱言他日結婚會揀與Sean定情的非洲：「我個人一定要有計劃，我想喺非洲結婚，但一定唔係今年嘅事。」
談到會否因媽咪恨嫁女而加快步伐？婷婷即企硬表態：「我唔會為其他人而做，我哋兩個暫時都真係未有計劃。（視Sean為結婚對象？）我同佢拍拖就梗係啦，如果唔係就大鑊啦！我唔急生BB，所以唔急結婚。」但她臨尾亦補充說：「我希望喺結婚後至生BB，不過唔覺意有咗都冇所謂。」
指Lucas大個怕醜
自哥哥謝霆峰與張栢芝離婚後，婷婷一家鮮有機會見Lucas和Quintus，她說近日剛與兩個姪兒相聚，還慨嘆兩個姪兒快高長大：「佢哋真係大得好快，以前叫Lucas錫我即刻飛撲埋嚟，依家反而怕醜咗要諗吓。（哥哥都有見？）就係哥哥有得見，我先有得見。」而周柏豪近日周圍飛，忙錄音之餘更為9月演唱會日日地獄式操肌肉，已有六舊腹肌的他說老闆十分滿意他操肌的成績。
文：名人組