連詩雅撩基仔 玩四角戀
歌手連詩雅、林欣彤、方皓玟及古巨基將合作舉行音樂會，三女不怕同場較量，更構思將來攜手合作演舞台劇，大玩四角戀，創意多多的方皓玟以榴槤形容自己，自詡夠堅可以食一世！
忙於為下個月的「拉闊音樂會」排練的連詩雅（Shiga），屆時同場還有林欣彤（Mag）、方皓玟（Charmaine）及古巨基，三女首次同場較技，她們異口齊聲不擔心會被人拿來比較，她們說：「我哋企喺同一陣線，今次目的以歌聲踢走社會上負能量。」今次能在音樂上合作，大家非常開心，方皓玟更提議下次再合作舉行舞台劇，Shiga即和應說：「我心目中有個構思，就係玩四角戀，好多時舞台劇嘅題材都以愛情為主，就由古Sir周旋喺四角關係裏面，再加啲音樂元素，我諗會好吸引。」
方皓玟自比榴槤
被讚創意多多的方皓玟，她自詡是一種很獨特、但不是人見人愛的生果：「我覺得自己好似榴槤味道咁堅，鍾意榴槤嘅人就可以食一世o架。」在旁的Mag即笑言最愛榴槤，她笑說：「榴槤係我至愛，我都好覺得方皓玟好似榴槤，先講外形，之前Charmaine試過一啲好獨特嘅造型，但有機會同佢接觸溝通過，先發覺佢都唔係咁似榴槤個殼咁難以接近、咁硬朗，其實佢都有溫柔一面，好友善，就好似榴槤果肉，軟綿綿又甜美。」
Shiga形容讀書時已封基仔做「男神」，她說：「我同朋友唱K，一定揀古Sir啲歌嚟唱，今次有機會同台，我當然好想翻唱佢啲歌。」Shiga給基仔的印象是擁有模特兒身形，他說：「佢喺舞台上有壓台感，有台型。」而小巨肺阿Mag唱歌有Power，Charmaine則是在音樂上有很多想法的女歌手，大讚她有種騷在骨子裏的吸引力。
文：音樂組