張致恒荷蘭慘：世盃已完！
「荷蘭仔」張致恒（Steven）與莊思敏前晚力撐荷蘭進身冠軍賽，豈料互射12碼以4比2慘敗給阿根廷，Steven反晒白眼大嘆：「我嘅世界盃完咗喇！」
昨晨世盃四強阿根廷大戰荷蘭，賽前不少藝人包括「荷蘭仔」張致恒（Steven）、莊思敏、狄易達等均熱捧荷蘭，前晚出席無綫世界盃節目《四強森巴嘉年華》直播時，Steven更盼望荷蘭能擺脫「二奶命」捧盃，莊思敏則勁讚荷蘭球員愈踢愈有火！可惜全場120分鐘和波收場，雙方互射12碼分勝負，最終阿根廷以4比2擊敗荷蘭，令一眾「荷粉」大失所望！
慶幸冇落重注
流住荷蘭血的Steven昨日透過電話大嘆：「我嘅世界盃已經完咗喇！」不過，他認為荷蘭隊已盡力，加上阿根廷實力強勁，故未有感到太失望。連續兩日開早收晏的Steven又上載「反白眼照」上Instagram 呻攰，他也坦言昨晨睇波難集中。
因為輸波唔開心的莊思敏，坦言賽事未及預期精彩，見射12碼定生死，她也表示已打定輸數：「睇到荷蘭球員好攰，冇之前嗰種爆炸力，到12碼佢哋體力下降得好勁，加上一向阿根廷射波叻。」作為巴西及荷蘭粉絲的莊思敏，又笑稱突然做了「明燈」，幸未有落重注買荷蘭奪冠。
對於決賽阿根廷將對德國，Steven、莊思敏及何傲兒（Lily） 均力撐德國贏，三人也大讚德國隊有技術、有效率。
阿叻改捧德國
一向是荷蘭隊的擁躉的陳百祥在球場內直擊賽事，眼見荷蘭輸波，他昨受訪時坦言要轉軚：「決賽要改捧德國，德國隊從來實而不華，打到主辦國巴西7比1，士氣如虹，絕對睇好破歐洲球隊從來未在南美攞冠軍嘅宿命！」
文：影視組