宋慧喬優雅淑女
近年韓風愈吹愈烈，韓國男女明星除了俘擄粉絲的心外，他們的衣着打扮亦成為潮流指標和倣效對象。上星期，兩代男神Rain及李敏鎬分別旋風式襲澳門和香港，兩人均以斯文靚仔Look示人，而人氣男團Big Bang隊長G-Dragon現身巴黎時裝周時則以潮爆打扮搶鏡。韓國人氣女星全智賢與宋慧喬早前先後於上海出席活動，兩人分別以一白一黑的連身短裙亮相，簡單得來卻十分省鏡。名模陳嘉容就大讚全智賢清新甜美，充滿夏日氣息，而宋慧喬則高貴優雅，散發淑女氣質。
全智賢
「好清新，好有夏日氣息，對高踭鞋係亮點，鞋上面有條紅色搭帶，令成個Total look變得好搶眼，增添幾分甜美感覺，唔會成身白色咁齋。髮型化妝亦係佢一貫嘅自然風格，簡單就是美。」
宋慧喬
「好靚，好有女性韻味，高貴優雅，裙款簡單得嚟有details，裙腳有啲皺褶顯得好別致，髮型同化妝好襯，散發淑女氣質。」
李多海
「呢個裙款好多年前已經見過，依家呢個年代仲拎出嚟着，有啲out out哋、娘娘哋，亦冇咩星味，唯一可取係騷到佢對白滑美腿，叫有番啲睇頭。」
崔智友
「Smart casual嘅打扮，簡單配搭Classic又不失時尚感，髮型化妝都簡單清新，望落感覺舒服，但就唔算特別，普通去街Look。」
G-Dragon
「幾靚，黑撞綠幾有個性，幾突出，襯得好有心思，襯條長頸鏈令整個total look更有層次感。美中不足係相對於佢嘅身形比例件褸偏長，如果改短少少就Perfect。」
Rain
「好Sharp醒，官仔骨骨嘅打扮好有新鮮感，同平日嘅Hip Pop跳舞形象好唔同，令人眼前一亮。」
李敏鎬
「個樣好靚仔，身形又夠高大，可惜套衫太沉色，太Casual，完全唔突出，着到佢毫無星味，套衫換米白、卡其或者啲鮮色嘅顏色會好睇好多，搶眼好多。」
簡約嫵媚
夏天最舒服涼快又最方便的服裝Item一定非one-piece短裙莫屬，而且每逢夏日都必會流行，看看韓國兩大美女全智賢和宋慧喬到上海出席活動時都一致揀選穿着one-piece短裙示人就知道，一條設計簡單、剪裁出眾的one-piece短裙可以陪你游走不同場合，而且不用左披右搭，花心神去配襯，一笠就可以輕鬆出門，輕易散發出女性嫵媚美態。
Profile
香港著名模特兒陳嘉容（Eunis），曾為各大國際品牌行時裝騷，在時裝界打滾多年，無論有關時裝的理論還是實戰都難不倒她，她近年更為電視的時裝節目擔任主持，化身stylist教人配襯衣着打扮。