莊思敏Ｘ王子涵 忍辱負重
藝人莊思敏和王子涵來自不同年齡階層，但入行時均背負家人的壓力。莊思敏入行孭着「馬來西亞拿督女兒」之名；王子涵則是「王晶女兒」的身份。二人坦言在圈中有背景，反而令她們的路行得更困難重重，飽受壓力。
受盡冷嘲熱諷
王：我入行孭住「王晶個女」來頭，你都係馬來西亞拿督個女，你當年入行有冇壓力？
莊：入行初頭冇人知我阿爸係馬來西亞拿督o架，後嚟畀人知道後自己都有壓力o架。未畀人知時工作舒服好多，所有嘢、機會、待遇都公平。但畀人知道咗身份後，聽到好多閒言閒語，相對演出機會都少咗，因為大家擔心我係玩玩吓、唔志在份工，以為我工作態度會唔好。印象中最深刻聽過「其實你屋企都唔憂，不如唔好同人爭啦，畀啲機會其他人啦。」我當時有唔開心o架，如果我唔志在份工都唔入行啦，點解因為家庭背景會有不同待遇呢？
王：我都聽到好多難聽說話，我睇好多網上留言，有人話「你老竇拍三級片，你都去拍三級片啦！」、「你都出嚟露肉呀？」當時自己都好傷心。我心諗，我露肉露唔起，不過依家諗番都好好笑，我心情好啲就百無禁忌，見到當睇唔到。如果心情唔好就火水燒上頭o架嘞。其實我好細個接觸娛樂圈，三代都做電影，真係薪火相傳，我細個已經好有表演欲，我姑姐喺無綫兒童組做導演，我細細個就去做節目《閃電傳真機》，其實我早過你入行o架。我做過「森美小儀劇歌劇團」，我第一部電影係客串《野蠻秘笈》，做張栢芝童年。
嫁杏無期？
莊：我以前都有同自己講28歲前結婚，依家都過咗啦，結婚隨緣，依家set咗68歲。不過我唔介意閃婚，只不過依家未遇到適合人選啫。我唔會唔畀藝人拍拖，拍拖、結婚、生仔都得，我覺得事業只係人生嘅一部分，唔可以因為事業影響人哋嘅人生。娛樂圈已經冇保證，簽咗一份藝人合約，唔擔保你六年後會得到啲咩。但一段婚姻可能保證到你嘅人生，如果六年後唔做呢行，但期間又錯失咗對象，咁就錯失埋個人生。
王：我諗我喺合約期內可能會拍拖，但唔會結婚，我比較老套啲，有機會嚟唔想因為結婚打斷自己工作計劃，結婚後就會諗生小朋友o架啦，會搞亂咗我自己，因為有小朋友就係責任同承擔。
入行自力更生
莊：我由第一日入行家人已反對，但我清楚自己做咩，佢哋知我性格講極都唔會聽。父母最擔心子女喺出面搵唔到食，擔心我搞唔掂，我就係要慢慢做畀佢哋睇。我由入行後都冇拎屋企人一毫子，佢哋諗住斷我糧逼我返轉頭，覺得我搞唔掂自己就會返屋企。但我性格好硬頸，你斷我糧我就更加唔返嚟。每個人都應該靠自己，父母養到你咁大、供書教學完咗，係時候都應該靠自己。
王：我同你唔同，我父母放得我幾開，當我話要簽約做你公司旗下藝人時，我都擔心過佢哋唔畀。但點知佢哋好簡單咁就話無所謂，爸爸講咗一句「你入行就要對自己負責任」。我明佢都係想我好，佢仲好老實咁同我講多句「我真係唔使你養我。你照顧到你自己就得嘞。」
莊：點解你肯簽畀我？
王：我問過爸爸，佢話簽啦，莊思敏係叻女嚟o架！
莊：真o架？多謝晶哥。我要努力啦，自己都簽過唔同公司，同過唔同經理人合作，都知點去運作一個藝人，經理人可以為藝人鋪一條路，但最後成唔成功好講佢自己點行，行嘅速度係點靠自己，你嘅優點係你好聽話。最初我有個隱憂，因為你出生於娛樂世家，你一張開眼就喺娛樂圈，你會覺得乜都會比我清楚、乜都清楚過我，好在你冇。藝人要不斷進修自己，香港電影唔多，好難得先有一個機會，當有機會你要把握到。
闖娛圈零保障
王：我其實開頭識你，你開舖頭做生意、又開經理人公司、又做節目主持，你咁多工作都擔心你搞唔搞得掂o架？但又偏偏畀我發現你樣樣都得，真係好佩服你，好犀利。
莊：如果藝人冇經理人，運作上有難度。做模特兒好啲，但做藝人好大機會碰釘，香港好在冇潛規則，但都有好多規矩要守。有時冇人照顧好難保障自己，以前都會有啲工作叫藝人到酒店面試，呢個好危險，就係要靠脈絡去了解成件事性質，要知點解要去酒店？所以要識多啲人，唔怕問，有時有啲騷真係喺酒店做面試，因為要就啲外國返嚟香港嘅客戶老闆，所以要自己醒目同問清楚。
王：我好彩又冇試過畀人呃，可能好多人知我係邊個。不過就試過畀人壓價，收咗一個好低嘅價錢，但當日嘅衫唔算少布但唔算多布，嗰時真係好唔開心，唔合理。之後都冇再接嗰間公司嘅工作。其實你咁多生意，自己最想做好邊一部分？
莊：我最想做藝人，但我咁多生意，因為我份人冇乜安全感，娛樂圈呢份工好被動，無論幾紅都會有消失一日，如果期間有咩意外發生就乜都冇。我做生意想長遠，趁依家仲有能力喺幕前搵錢，去養住我旗下啲公司，做生意流動資金要有，仲要守業，最使錢係呢個時間。
王：我自己最想拍戲，電影可以話係我一個情意結，我好鍾意睇愛情片，好似《百份百感覺》嗰類型，細個已經好鍾意。模特兒都想做。我畀自己六年時間，如果做到女配角角色，唔使被提名，有人認同已經對自己有一個交代。
文：影視組
服裝：MS_Clothing、Flux
化裝：Steve Wong
髮型：Carmen Yuen
場地：Beauty Kingdom