李嘉欣切息肉老公呵醒
於活動上姍姍來遲的李嘉欣，自爆昨日下午入院切除腸胃息肉。驚怕手術一睡不醒的她，幸得老公許晉亨冧爆鼓勵，難怪即日出院的她，仍明艷照人，大騷白滑玉背。
「大美人」李嘉欣昨晚出席賽馬會「冠軍人馬獎頒獎典禮」時姍姍來遲，向來十分重視時間觀念的她，表示下午入院照腸胃內窺鏡：「因要全身麻醉，頭先啱啱出院，依家仲wing wing哋，又要趕住化妝，所以遲咗。」她表示兩年前入院照過，當時亦發現有息肉：「今次照到就即刻切咗，醫生話好普遍，所以唔使擔心。」記者指嘉欣身形比以前瘦削，她謂：「每次做檢查都會驚，會嚇一嚇，因為兩年先做一次檢查，唔知會唔會有咩事。每次檢查嗰時，都覺得平時唔夠愛錫身體。頭先做檢查喺口度插入去，所以把聲有啲變。」
曾割8粒良性瘤
問到老公許晉亨有否一同做檢查？她表示：「冇，因為需要其中一人保持清醒，自己覺得好驚，同老公講：『會唔會一瞓就唔識醒？』佢就話：『放心，你一定會醒，我會繼續『哦』你！』」其實早於兩年前，嘉欣亦曾自爆割去腸胃8粒良性瘤，同樣是照腸胃內窺鏡後，發現即切除，其勇於求診的精神十分正面。此外，談到昨日名模Amanda宣布離婚一事，嘉欣自言很愛其甜品店的蛋糕：「聽到咁嘅消息覺得好可惜，成年人做得呢個決定，一定係一個好嘅決定。夫妻相處之道順其自然，一齊係緣分，就算一齊唔到，成年人都會成熟咁去處理。」
文：名人組