祥仔嘥戲：最緊要入屋
由黎耀祥及胡杏兒主演的《巾幗梟雄》第三集因一場「雞姦戲」被飛出台慶劇之列，令三屆視帝祥仔可能無望四度稱帝，他坦言最緊要劇集入屋兼受歡迎，而高層區偉林昨稱此事沒有人需要問責。
金牌監製李添勝（添哥）主理的無綫劇《巾幗梟雄》系列劇集收視、口碑俱佳，黎耀祥亦憑此系列兩奪視帝，而今次第三輯《巾幗梟雄之諜血長天》由祥仔及胡杏兒孭飛，拍得辛苦之餘，杏兒更坦承壓力爆煲。據《好報》昨日報道劇中祥仔的童年被雞姦場口，之前已被無綫總經理李寶安下令禁拍，但添哥卻當耳邊風照拍，事後竟聲稱「中蠱」及拍到想死，震怒的李寶安為保聲譽將原本30集刪剪為15集，帳面蝕1,500萬元，戲劇科總監曾勵珍及其頂頭上司區偉林亦被照肺。
或無緣四奪視帝
一場雞姦戲慘令無綫蝕大錢、浪費演員努力，更令此劇不能成為今年台慶劇，祥仔接受訪問時被問可感可惜？他謂：「唔會，拍時根本唔知係咪台慶劇。（可能只在周六、日時段播放？）《衝上雲霄》都唔係台慶劇，星期六好似《飛虎》收視都好好呀！最緊要入屋、受歡迎。」問到事件可能令他無緣四奪視帝？他說：「都係嗰句，最緊要觀眾鍾意，觀眾鍾意睇就得。」
記者昨日致電給無綫助理總經理區偉林，他就事件回應稱：「唔係淨係因為一場雞姦戲，全套戲我哋要睇多啲先，睇吓係咪有啲場口要剪，依家好模糊，要再檢測吓先！」談到此劇原為台慶劇，他說：「從來冇話係台慶劇，當然我哋係有啲心儀名單，但要睇拍出嚟效果。（咁台慶劇定咗邊套？）未有定案。」
對於製作上硬蝕1,500萬元，區偉林說：「唔係咁計，每個出產都要QC，呢個係我哋責任，對觀眾唔好嘅唔會播！（呢件事有冇人要負責任？）冇人要負責，向來創作交畀同事，唔會太干預，只係有時劇本意識唔係好配合，會有少少意見。係咪套套劇都要有強姦、雞姦場口呢？唔適合、過咗位咪做過。」
文：影視組