朱千雪撐球迷冇惡意
藝人朱千雪與女子組合Super Girls前晚於上水出席世界盃活動，問到力撐巴西隊的朱千雪有否留意張秀文及苟芸慧等，於巴西被球迷抽水的事件？她稱對方應冇惡意：「有聽過球迷好熱情，但應該冇惡意。」她又謂冇人約睇波，惟有於家中自high觀賽。
問她是否與馬國明（馬明）情侶檔拍廣告？她說：「開心一齊做嘢，（傳緋聞令身價上升？）OK。」談到會否因此嚇怕追求者？她笑言嫌馬明「阻住晒」：「如果想識我，就唔好驚馬明，直接問我就得，（叫人主動出擊？）係，如果唔係嚇走晒點算！」但她又自爆生日獲馬明捧蛋糕慶生：「開心只係因為有蛋糕食！」
