王敏德二女烏歪 搵大隻男調教
名模馬詩慧（Janet）和王敏德（Michael）剛在美國出席二女王麗嘉的畢業禮，Janet踢爆在美國獨居的二女住所幾近水浸，但她竟愛理不理，才驚覺女兒非常「烏歪」，Michael則希望找個大隻男友保護女兒。
Janet、Michael和長女王曼喜之前到美國出席二女王麗嘉的中學畢業禮，前日才返港，由於細仔要準備考試故未有同行。一向眼淺的Janet笑言今次很少喊，原因是坐長途機太攰所致。她說：「佢間中學香港冇直航機去，坐超過30個鐘頭飛機，人好攰，仲病咗係咁咳。阿女喺嗰度讀咗三年書，我都係第一次去，成日被個女投訴。不過今次去見識到佢啲烏歪，佢自己住個單位好污穢，廁所塞到水浸都唔理，又亂，嚇死人！」
不捨細仔離港讀書
現年19歲的王麗嘉曾想過繼續進修運動課程，但Janet指女兒已改變主意，讀大學會選修室內設計。問她細仔會否效法兩位胞姐出國讀書？她笑說：「我最怕啲人喺我個仔面前問佢幾時出國，我希望留得佢幾耐得幾耐。其實我大女都係完成中學先出國，希望細仔都唔好太早出去，會唔捨得。」
另外，王敏德昨日出席新書發布會，他自爆與太太在二女畢業禮上感動落淚，並指校長讚麗嘉讀書有心機、性格好又友善，令他大感安慰。提到美國經常發生校園槍擊案，會否找個男友保護女兒？他說：「呢個（提議）都好，要搵個大隻又聰明，個女應該都有拍拖。」同場還有甄子丹太太汪詩詩和表妹湛琪清，詩詩透露早前與老公到峇里工作，順道過二人世界，但她中文不好，竟將峇里誤當巴黎，弄出不少笑話 。
文：名人組