桂莉芙透視女性美
奧斯卡影后桂莉芙白德露與韓國女星李英愛早前先後襲港，難得來港跟大家見面，兩人的衣着打扮當然不容有失，而與李英愛同場享用晚宴的千億新抱徐子淇和跳水公主郭晶晶亦盛裝赴會。另外，一眾荷里活女星為宣傳電影同樣執到正出席首映禮，務求要以最靚一面示人。名模陳嘉容就大讚桂莉芙高貴大方，穿着的喱士連身裙切合她的style，透視性感之餘散發女性美；李英愛則清麗脫俗。
桂莉芙白德露Gwyneth Paltrow
「佢一向着衫都係高貴優雅，大方得體，今次都唔例外，條裙好啱佢嘅style，喱士嘅透視效果性感得嚟又散發出溫柔女性美，加上佢均勻嘅身形線條，貼身設計着得好靚。」
李英愛
「淡粉紅色喱士套裙好襯佢『氧氣美女』嘅氣質，清麗脫俗，大方優雅，望落個感覺好舒服，套衫嘅款式好classic，無論咩年代着都唔會out，淡妝配上簡單髮型已經好靚。」
徐子淇
「今次有少少失策，失去咗佢一貫高貴優雅嘅味道，條裙有少少過分肉感，唔襯佢嘅氣質，雖然係透視，但感覺好似露上又露下，顯得有啲俗氣。」
愛瑪史東 Emma Stone
「條裙本身好難carry，要好fit先着到，多少少肥肉都會唧晒出嚟，愛瑪身材夠纖瘦，着得十分好睇，飄逸似仙女，不過髮型出咗事，拉番直又或者係梳起會靚好多。」
郭晶晶
「條裙、化妝同髮型都好靚，不過始終佢係跳水運動員嘅身形，呢條裙會着得佢更橫，着啲入膊設計嘅晚裝修飾番個線條就更加靚。」
金美倫戴雅絲Cameron Diaz
「hot hot hot，性感淑女feel，佢條Little black dress設計特別，即使出席隆重場合都完全唔會失禮，髮型同化妝亦十分襯，演繹咗簡單就是美，金髮撞黑色都好靚。如果加番啲accessories例如頸鏈、耳環同戒指會更sharp。」
Angelababy
Little black dress是長青款式，也是女生們衣櫃的must have item，而今個春夏，時裝界就掀起另一股清新的Little white dress風潮，近期一眾女星力撐，雖然只是清雅的白色，但在各大門派的設計師構思下，設計和款式非常多變，甚至拆解再組合成shirtdress、高腰連身圓枱裙、lace dress及晚裝等，玩盡各樣質料與細節裝飾，絕不會讓人感覺沉悶，反之更富摩登氣派。
早前Angelababy與韓國男神金秀賢在首爾出席活動時，亦以Little white dress上陣。
Profile
香港著名模特兒陳嘉容（Eunis），曾為各大國際品牌行時裝騷，在時裝界打滾多年，不管時裝理論還是實戰都難不倒她，近年更為電視的時裝節目擔任主持，化身stylist教人配襯衣着打扮。