鄭嘉穎歎雞唔使錢

藝人鄭嘉穎昨日出席「KFC點醬雞棒魔幻派對」，席間除了播出他的最新廣告外，還即場獲贈「KFC請足一世免費食雞」，嘉穎亦識做回贈一架模型跑車予品牌的高層。

傷韌帶未斷尾

嘉穎對獲贈「一世免費食雞」非常開心，笑言未知可否拿多人分量，問到今次酬勞是否可買豪宅？他笑說：「滿意啦。（回歸香港工作？）都一段時間冇拍劇，下個月會為無綫新劇《天眼》開工，同陳展鵬、楊怡合作。（之前腳傷延遲開工？）我哋都開咗會，頭一個月會以文戲為主，第二個月先會有動作戲，因為我右腳傷咗韌帶都幾麻煩，仲未斷尾。（幾時斷尾？）如果唔係之前以為好番走去打咗場波，都已經斷咗尾，打完波之後就腫到好似西瓜仔咁，我諗仲有兩個月先會好番。（新劇有冇危險場口？）未知，未有劇本，但槍戰就少不免，跑跑踢踢一定有。」

放大圖片	嘉穎現場大派美食，fans踴躍試食。

冇人想接爛劇

有指香港演員北上拍劇為了搵銀狂拍爛片，嘉穎說很多因素不是演員可控制：「拍每一套劇前唔會知得唔得，冇人會想接爛劇，就算我拍《步步驚心》之前都唔知會反應咁好，唔係話想拍好劇就有得拍。」談到他回流香港拍劇的演員都熟口熟面，在TVB工作十多年的他，笑言很難有演員未合作過：「演員永遠都係一代接一代，唔會永遠都係我呢個世代，要等新一代演員冒起就會有新鮮感。」

文：影視組