Kelly被爆大花筒 向家輝反擊
梁家輝及鄭伊健兩位已婚型佬，前晚宣傳新片時交流御妻心得，家輝更笑笑口批評同場人妻陳慧琳（Kelly）使錢有如大花筒，Kelly聞言即發揮其「烈女」本色，碌到對眼大一大，一輪嘴還擊，更爆家輝拍攝現場如何愛妻如命。
梁家輝、鄭伊健及陳慧琳前晚出席依波路錶冠名贊助的電影《盜馬記》首映，家輝與伊健均以bow tie造型示人，被讚型佬典範，Kelly則以一身鮮黃色露腰裙亮相，與有份演出的Mandy Lieu大露背look、撐場的陳法拉銀色晚裝互相輝映。
封伊健新一代男神
家輝自封男神，他說：「我係上一代男神，伊健係新一代男神。」提到稍後轉往台灣及星馬等地宣傳，家輝爆料說：「Kelly之前喺布拉格拍外景使好多，我就知慳識儉，成家嚟晒陪我，已經好happy，使乜買嘢？（唔買嘢氹老婆？）使乜呀！已經係老婆啦！我教訓過伊健，錢唔係用嚟買啲唔環保嘅嘢，係Kelly教極唔聽！」
Kelly否認自己是大花筒，她說：「誇張啦佢，黐線！我買啲嘢好平咋，指甲銼、啤酒cream！唔係名牌，都冇手袋、靚衫，使咗好少之嘛！（梁家輝叫人唔好買嘢氹老婆？）死梗喇佢！唔好話我唔畀tips佢吖，你買個指甲銼都好呀！佢喺現場對老婆好好呀，係冇買指甲銼就差啲啦！今次有人成日陪老婆食早餐添！真係好sweet，好好味呀！（梁家輝御妻術得把口？）咁我就唔知喇！」Kelly解釋自己老公因要留港湊仔，故沒有到布拉格陪她。
法拉恨與古仔合作
家輝又大講夫妻相處之道，他說：「唔使咩御妻術嘅，女朋友先要御，夫妻就講尊重，互相享受生活，買嘢啦喎，應買則買。」伊健在旁聽畢，似乎獲益良多，他說：「我認同感情唔應該同物質掛鈎。（認同佢話你係「新一代男神」？）我係中一代啫，新一代畀韓國霸晒啦！」
法拉被問會否與吳鎮宇、張智霖合作新片，她說：「未收到通知。我都想再合作。（古天樂會加入？）古仔好有新鮮感，好期待同佢合作。」法拉又指現時仍屬自由身，去向暫時未可宣布，但正洽談電影計劃。
文：影視組