Kary認輸身材祝福樂仔蜜運
余文樂（樂仔）與吳雨霏（Kary）分手後，最近秘交中瑞混血兒新歡Ase Wang（王惠敏），二人更蜜遊洛杉磯，昨日Kary與狄易達、琦埼及馬詩慧出席手袋活動，Kary並不知樂仔已另結新歡，笑言亦毋須向她交代，她也不會覺得難受：「都過咗大半年，各有各生活。（祝福佢？）會，如果佢真係有女友，我會祝福佢。」
Ase身材索爆擁有32C上圍，Kary豁達地說：「好多女仔身材好過我。（你搵個42吋胸肌男友囉！）好呀。（會唔會同樂仔八卦吓？）唔會，睇吓佢會唔會講，大家都係朋友。（佢哋喺Instagram上載旅行相洩露戀情。）我都有關注樂仔嘅Instagram，但冇細心去研究。其實大家都分開咗，有另一半都好正常。」感情空白的Kary直言恨拍拖，但會順其自然，問到想找圈內還是圈外人男友？她笑言：「唔到我揀，圈內人壓力就大啲，不過我冇時間出去識新朋友。」早前她出風瘌，病情已穩定，自嘲做了兩個星期蒙面超人（指戴口罩），但仍要食藥。
周柏豪否認反目
另方面，男主角樂仔與女主角Ase昨日分別就撻着作回應，樂仔透過公司發言人表示與Ase只是好朋友，目前身在日本工作，對事件不欲多談。女模Ase亦透過經理人表示和樂仔相識多時，大家只是朋友。
至於跟樂仔是波友的周柏豪，傳出他與樂仔反目，所屬的「橫洲工業」球隊日前拍飲品廣告時飛起柏豪，前晚柏豪出席汽車活動時直指報道失實：「完全唔係事實，我同樂仔都冇問題，佢都會叫我一齊去旅行，但我真係有嘢做。（點解冇份拍廣告？）因為我嘅演唱會傾緊另一個飲品贊助商，唔想牽涉到同類產品有衝突。（有傳因為你同隊友細妹拍拖令兄弟情決裂？）冇呢件事。」
文：名人組