吳啟華開劇斟徐子珊幫拖

徐子珊和吳啟華昨日清晨到海洋公園拍攝無綫劇《再戰明天》，劇情講述子珊因憶起童年陰影，最後在旋轉木馬上暈倒，依偎在啟華懷裏。啟華透露拍畢此劇會籌備成立個人工作室：「演員好被動，想拍啲似樣啲嘅嘢出嚟，會同編劇開會度劇本，首套劇會係關於中醫。（自己做主角？）睇吓點，啱就做，唔啱就做幕後。（女主角人選？）未諗。（考慮子珊？）會呀，佢好好，好尊業。」獲讚的子珊開心地說：「最好啦，希望啟華哥帶我去搵吓錢，雖然未拍晒，但我已經好唔捨得個劇組，希望可以繼續合作。」

劇情講述子珊暈倒，吳啟華即攬實免她跌傷。

獲吳啟華讚專業的子珊笑逐顏開。

懶理老婆

提到昨日是白色情人節，啟華透露愛妻正身在北京，但不會致電老婆表愛意：「從來都未慶祝過呢啲，上月情人節我都要開工。（老婆詐型？）唔理得咁多，話之佢。」他又稱上一次見老婆是在港過年：「佢鍾意北京，唔會返嚟。（北京空氣質數差，擔心佢健康？）佢得o架喇，同佢講咗唔好，但佢話佢啲朋友喺晒北京。（過北京探佢？）要做嘢，我一年都返唔到兩、三次。（掛住？）唔掛，掛佢會嚟搵我。」

子珊承認現在有圈外追求者，但未試過單獨約會：「都係成班朋友一齊食吓飯。（唔撐枱腳？）唔得閒，而且想睇清楚啲，了解多啲先。（對佢感覺ＯＫ？）ＯＫ就結咗婚啦！其實未啱timing，要拍劇就要有取捨，冇計。」

文：影視組