婷婷 戴尚安連體sweet爆
謝婷婷與名媛李桂蘭兒子戴尚安（Sean）相戀以來，為保愛苗將戀事保持低調，但隨着兩人打得火熱，感情逐漸浮面，前晚Sean的朋友為他舉行生日派對補祝生日，婷婷全程陪伴在側，壽星公開心得滿場飛，席間Sean正式向朋友介紹女友，確認婷婷的女友身份，「婷安戀」正式公開。
去年《好報》獨家踢爆Sean帶同婷婷前往布吉出席友人的婚禮，事後婷婷在活動中亦大方承認與Sean正在了解中，惟兩人為保愛苗，將感情低調處理。
前晚Sean的朋友在中環KEE Club為Sean補祝生日，出席的全部是Sean的朋友，除婷婷外，還有慈善工作的拍檔，以及一班名模如Rosemary、Jocelyn與老公Anthony等，整晚婷婷與Sean儼如連體嬰黐到實，而Sean有婷婷陪伴，開心到滿場飛，還不停介紹婷婷給朋友認識，兩人的拖友關係正式公開。至昨凌晨時，有份出席的嘉賓將派對的照片放上網與友分享，但不夠半小時即火速刪除，為防「婷安戀」曝光。就算平時健談的Jocelyn，昨日都避談。
約咗阿媽甩底
記者昨日致電李桂蘭，她透露兒子正日生日是本月15日，她說：「正日同家人食飯慶祝，（婷婷有冇去？）冇去，都係自己屋企人。（前晚生日派對你冇去？）原本約咗佢一齊去馬術晚宴，後來同我講話同朋友慶祝生日，嚟唔到，（知唔知婷婷有去派對？）唔知，冇問佢，（Sean正式同婷婷拍拖？）你問番佢，佢啲嘢唔係咁清楚，佢鍾意邊個冇所謂，最緊要開心，仔大仔世界，我哋好開通，（Sean有冇帶婷婷見你？）我同婷婷識咗好耐，之前喺唔同活動都見過佢，大家一早已經熟咗。」
文：名人組